NASA: Марстан аса ірі органикалық қосылыстар анықталды
АСТАНА. KAZINFORM — АҚШ-тың Аэронавтика және ғарыш кеңістігін зерттеу жөніндегі ұлттық басқармасының (NASA) мамандары «Curiosity» марсоходы тапқан тау жынысының үлгісін талдау барысында аса ірі органикалық қосылыстарды анықтады.
Lianhe Zaobao басылымының жазуынша, бұл жаңалық Қызыл ғаламшарда тіршілікке қатысты ақпарат беретін химиялық заттардың бұған дейін пайымдағаннан әлдеқайда күрделі болуы мүмкін екенін көрсетеді.
Аталған зерттеу жұмысы «Proceedings of the National Academy of Sciences» журналына жарияланды. NASA мамандарының мәлімдеуінше, осы рет талданған тау жынысы 2013 жылдың мамыр айында «Curiosity» марсоходы Марстың Гейл кратеріндегі «Камберленд» жартасын бұрғылау кезінде алынған.
Ғалымдар Марстан алынған үлгілерді марсоход бортындағы талдау құрылғысы арқылы жан-жақты зерттеді. Нәтижесінде үлгінің құрамынан декаан, ундекаан және додекан молекулалары анықталды. Бұл қосылыстар сәйкесінше 10, 11 және 12 көміртек атомынан құралады және тау жынысында сақталып қалған май қышқылдарының жұрнағы болуы мүмкін. Айта кетерлігі, май қышқылдары — Жердегі тіршіліктің негізгі химиялық құрамдас бөлігі, бірақ олар әртүрлі биологиялық емес геохимиялық процестердің нәтижесінде де пайда болуы мүмкін.
Бұл зерттеу Марста айтарлықтай күрделі органикалық молекулалардың бар екенін көрсетіп қана қоймай, Қызыл ғаламшардағы органикалық молекулалардың тіршіліктің пайда болуына қажетті күрделілікке бір табан жақындай түскенін айқындап, марстық органикалық химияның дамуына жаңа бағыт сілтеуі ықтимал.
NASA-ның мәліметінше, «Curiosity» марсоходы бұған дейін Марста ұсақ әрі қарапайым органикалық молекулаларды анықтаған. Ал бұл жолы аса ірі органикалық қосылыстардың анықталуы ғалымдардың марстық органикалық химия туралы түсінігінің аясын кеңейтіп қана қоймай, болашақта Марстан алынған үлгілерді Жерге жеткізіп, озық зертханалық құралдармен тереңірек талдау жасауға жаңа мүмкіндіктер ашады.
Осыған дейін Маск жақын болашақта Марста тәуелсіз өркениет құруды жоспарлап отырғанын жазған едік.
