Наталья Богданова әлем чемпионатында қола жүлдегер атанды

АСТАНА. KAZINFORM — Қазақстандық боксшы Наталья Богданова (70 келі) әйелдер арасындағы әлем чемпионатында қола жүлдегер атанды.

Сербияның Ниш қаласында өтіп жатқан дүбірлі доданың жартылай финалында ол Лиза Эдель О’Руркпен кездесті.

Жекпе-жек барысында қос қарсылас тартысты бәсеке өткізді. Натальяның сәл басымдығы байқалып тұрды. Алайда ирландиялық боксшы да оңтайлы сәтте соққы жұмсап үлгерді.

Нәтижесінде Наталья Богданова қарсыласына есе жіберіп, әлем чемпионатының қола жүлдесін қанағат тұтты.

Наталья Богданова қазірге дейін әлем чемпионатында мұндай жоғары табысқа жеткен жоқ. 1999 жылы дүниеге келген ол 2022 жылы Жазғы Азия ойындарында қола жүлдегер атанған еді. Әзірге одан басқа қол жеткізген жүлдесі жоқ.

Қазірге дейін ел құрамасынан Виктория Графеева (60 келі), Назым Қызайбай (48 келі), Алуа Балқыбекова (50 келі), Аида Әбікеева (63 келі) финалға жолдама алды.

Енді ел құрамасынан Елдана Тәліпова (81 келіден жоғары) шаршы алаңға шығады.
Жартылай финалға дейін Жайна Шекербекова (54 келі), Жасмин Қизатова (66 келі), Карина Ибрагимова (57 келі), Надежда Рябец (75 келі), Анита Адишева (52 келі), Гүлсая Ержан (81 келі) жарыс жолынан шығып қалды.