Наурыз мерекесі күндері елімізде және шетелде демалу үшін қанша қаржы кетеді
АСТАНА. KAZINFORM – Наурыз мерекесіне орай ұзаққа созылатын демалыс кезінде қазақстандықтарға шетелге саяхаттауға тамаша мүмкіндік туып тұр. Energyprom.kz көктемнің басты мерекесі қарсаңында 21-25 наурыз аралығындағы демалыс күндерін шетелде немесе ел аймақтарында қалай өткізуге болатыны туралы ақпарат дайындады.
Алыс шет елдерге саяхаттау үшін көбіне әуе көлігі қызметін пайдаланасыз. Сондықтан олар жақын маңдағы елдерге автомобиль немесе теміржол арқылы саяхаттауға қарағанда қымбатырақ болады. Мысал ретінде Өзбекстанға сапарды алға тартайық. Бұл елге 4-5 күндік автобуспен саяхаттауға 180 мың теңге кетеді. Ал «Алматы — Түркістан — Ташкент — Самарқанд — Тараз — Алматы» трансшекаралық бағыты бойынша Jibek Joly пойызымен сапарласаңыз 190 мың теңге жұмсауыңызға тура келеді.
Алдағы ұзақ демалыс күндері үшін алыс сапарлардың ең бюджеттік нұсқасы — Біріккен Араб Әмірліктері (тур үшін бір адамға 220,7 мың теңгеден) мен Мысыр (255,7 мың теңгеден).
Туроператорлардың веб-сайттарындағы мәліметке сәйкес, ең қымбат нұсқа — Мальдив аралдары. Бұл аралдарға турдың ең төменгі құны 567 мың теңгеге жетеді, ең жоғарысы бір адамға 743,7 мың теңгені құрайды.
21-25 наурыз аралығында көптеген елге ұшатын сапардың құны айдың басқа күндеріндегі бағаларға қарағанда айтарлықтай жоғары. Түрлі туристік бағыттарда бұл айырмашылық 10 пайыздан 35 пайызға дейін ауытқиды, ал кейбір жағдайларда ол тіпті екі есе болуы мүмкін.
Мерекелік аптаны өз елінде өткізуді қалайтындар үшін көптеген демалыс нұсқасы бар. Наурыз айының соңына қарай Шығыс Қазақстан облысындағы ірі қала маңындағы жолдарда қар көшкіні қаупі мен ауа райын байланысты жолдардың жабылуы сақталады. Алтайдың сұлулығына тәнті болудың ең тиімді уақыты — жаз. 10 күндік жолдама құны санаторийлерде тұруды қоса алғанда бір адамға шамамен 500 мың теңгені құрайды. Бұл — Kazahstan.travel сервисінің деректері.
Наурыздың соңына таман оңтүстікте қонақтарды шуақты күндер күтіп тұр. Елдегі ең танымал туристік орындарға саяхат қазақстандықтар үшін салыстырмалы түрде аса қымбатқа түспейді. Мәселен, Алматы облысының сұлу табиғатына бір күндік турдың құны өңірлерден Алматыға баратын жол ақысын есептемегенде 8,5-10 мың теңгені құрайды. Облыста жеке экскурсиялар қымбатырақ, 40 мың теңгеге дейін жетеді. Жаяу немесе гиды бар автобус турлары 3 мың теңге тұрады.
«Ішкі туризм мәзірінде» көптеген белсенді аймақтық тур да бар. Қарағанды облысында шахталар мұражайын, Ақмола облысында Қорғалжын қорығындағы жайнаған жабайы қызғалдақтарды, Түркістанда атақты Қожа Ахмет Ясауи кесенесін тамашалауға болады. Аймақтардағы автобус турларының орташа бағасы — 30 мың теңге.
Былтыр наурызда Туризм және спорт министрлігі көктемгі мереке апталығы — Наурызнаманы еліміздің басты туристік бренді ретінде ілгерілету идеясын ұсынған болатын. Рио-де-Жанейродағы костюмді карнавалдар, Германиядағы Октоберфест немесе Жапониядағы сакураның гүлденуі сияқты. Туристік өнімді ілгерілетудің ұзақ жылдық бағдарламасынан кейін Қазақстанның биыл туристерді көбірек күтуге толық мүмкіндігі бар. Оның тағы бір себебі, CNN Travel Қазақстанды 2025 жылы саяхаттауға ұсынылатын 25 бағыттың қатарына қосты. Ал Алматы Орталық Азияның «жаңа стилді астанасы» деп аталды.
Бейінді ведомствоның мәліметінше, өткен жылы елімізге 15,3 миллион шетелдік келсе, оның 10 миллионнан астамы бір тәуліктен астам уақыт қонақ болды. Туризм және спорт министрлігі мамандарының есебіне сәйкес, 2024 жылы Қазақстанға келген шетелдік туристердің жұмсаған шығынының жалпы көлемі 1,2 трлн теңгені құрады.
Еске сала кетсек, Туризм және спорт министрлігі Ішкі істер министрлігімен бірлесіп, еліміздегі шетелдік туристерді тіркеу үдерісін белсенді түрде цифрландырып жатыр. Ал оған қазіргі көші-қон заңнамасына сәйкес қабылдаушы тарап жауапты. E-Qonaq жүйесі келушілер туралы деректерді жылдам және ыңғайлы беру үшін жасалған. Веб-сайтта ай сайын қонақтарды тіркейтін жеке және заңды тұлғалардың саны туралы статистикалық мәліметтер, сондай-ақ келушілер туралы ақпарат жарияланады.
Мәселен, осы жылдың қаңтар айындағы деректерге сәйкес, цифрлық жоба іске қосылғаннан бері сервис арқылы 3,7 миллион турист тіркелген, бұл әрине былтырға қарағанда 69 пайыз көп. Қабылдауышы тарап тіркеген аккаунттар саны 54,3 пайызға артып, 487,6 мыңға жетті. Бұл серпінді әзірге бүкіл туризм индустриясының жетістіктерімен салыстыру мүмкін емес. Өйткені қызметтің жұмыс істей бастағанына аз уақыт болды.
Дегенмен, E-Qonaq жүйесі өз рейтингтерін құрастыру үшін жеткілікті деректерді жинап үлгерді. Дереккөздің мәліметінше, биылғы қаңтарда өзге елдерден келген туристер арасында ең танымал өңір Алматы мен Астана және Атырау облысы болды. Шетелдік қонақтарды орналастыру үшін үздік үш орынға Kazakstan Hotel, Novotel Almaty City және Hilton Astana кірді.
Қонақүй бағасына келетін болсақ, олар өткен жылдың алғашқы үш тоқсанында сектордың барлық санаты бойынша өсті. Мәселен, Ұлттық статистика бюросының дерегінше, 2024 жылғы қаңтар-қыркүйек айларында бес жұлдызды қонақүйлердегі бір түннің құны бір жыл ішінде 12,1 пайызға көтеріліп, 62,6 мың теңгені құрады. Осы кезеңде төрт жұлдызды қонақүйлерде тұру құны екі есе қымбаттады: 30,2 мың теңге. 2023 жылдың 9 айымен салыстырғанда баға 17,1 пайызға көтерілген.
Былтыр қарапайым қонақүйлердегі баға да қымбаттады. Үш жұлдызды қонақүйлерде түнеу бағасы — 10,1, екі жұлдызды қонақүйлерде — 4,8, жұлдызы жоқ қонақүйлерде 10,1 пайызға дейін өсті. Бағаның шамалы төмендеуі байқалған жалғыз санат бір жұлдызды қонақүйлер болды.
