Наурызда 1 000 теңгелік банкнота жаңа дизайнмен айналымға шығады
АСТАНА. KAZINFORM – Қазақстан Ұлттық Банкі ҚҰБ Басқармасының кезекті отырысы өтті. Онда ақша және валюта нарығындағы жағдай туралы баяндама қабылданды. Бұл туралы Ұлттық банктің баспасөз қызметі мәлім етті.
— 2025 жылғы 28 наурыздан бастап 2024 жылғы үлгідегі өзгертілген дизайны бар 1 000 теңгелік банкнотаны айналымға шығару туралы шешім қабылданды, — делінген хабарламада.
Сондай-ақ 2025 жылы екі жаңа коллекциялық монета — «GRIFFIN» («Көшпенділер аңызы мен мифтері» сериясынан) және «OTYRAR» («Қазақстанды монеталар арқылы зертте» сериясынан) монеталарын шығару әрі айналымға енгізу мәселесі бекітілді.
Еске сала кетейік, бұған дейін сақ стиліндегі номиналы 2 000 теңгелік жаңа сериялы банкноталар айналымға шығатынын жазған болатынбыз.
Сондай-ақ Ұлттық банк футбол клубтарының коллекциялық монеталарын айналымға шығарады.
