Наурызнама: Қазақстан – ынтымағы жарасқан ұлттар мекені
АСТАНА. KAZINFORM – Бүгін – Наурызнама аясындағы Ынтымақ күні. Наурыз - тек көктем мерекесі ғана емес, сондай-ақ қоғамдағы бірлік пен ынтымақты күшейтетін маңызды әлеуметтік және мәдени құбылыс. Kazinform тілшісі Қазақстандағы ынтымағы жарасқан ұлттарға ортақ дүниелерге үңіліп көрген еді.
Наурыз мейрамы – еліміздегі барлық ұлт өкілін жаңару, бірлік және ізгілік секілді құндылықтар арқылы біріктіреді. Ынтымақты нығайтуға ықпал ететін бірнеше негізгі аспект бар:
- Ортақ дәстүрлер мен құндылықтар. Наурыз - көктемгі жаңару мен жаңа өмірдің, достық пен татулықтың белгісі. Бұл - Қазақстанда өмір сүретін барлық этносқа жақын мереке.
- Қонақжайлылық пен дастарқан жаю. Мереке күндері адамдар бір-бірін қонаққа шақырып, дәстүрлі тағамдар әзірлейді, халықтың ынтымағы нығая түседі.
- Мәдени әртүрлілік. Мереке аясында концерттер, жәрмеңкелер мен ұлттық ойындар өткізіледі. Әртүрлі этнос өздерінің дәстүрлерін, ұлттық киімдері мен әдет-ғұрпын көрсетеді.
- Бірлік пен бейбітшілік идеясы. Қазақстан түрлі ұлт өкілінің бір шаңырақ астында бейбіт өмір сүруімен танымал, ал Наурыз – ұлтаралық келісімнің, өзара құрмет пен қоғам бірлігінің символы.
- Жалпы халықтық серуендер. Мереке күндері Қазақстан халқы көшеге шығып, жаппай мерекелейді. Бұл мәдени шекараларды жойып, ұлт пен ұлыс өкілдері арасындағы достық қарым-қатынасты нығайтады.
Сенат депутаты Геннадий Шиповских атап өткендей, Қазақстан - ынтымағы жарасқан ұлттар тұратын ыстық ұя.
- Наурыз мейрамы – барша қазақстандықты жақындататын мереке. Қазақы жаңа жыл десек артық болмас, 22 наурызда күн мен түн теңеседі. Наурыз мейрамын тойлаудың онкүндігі бекітілген. Оның аясында ән күн ерекше аталып өтеді. Наурызнамадағы әрбір іс-шара ұлттардың өзара сыйластығы мен құрметін арттырып, Қазақстандағы татулық пен келісімнің нығаюына септігін тигізеді.
Сондай-ақ мейірімділік, қонақжайлылық, қол ұшын созу - Наурыздың негізгі құндылықтары, себебі бұл қазақ халқымен қатар, еліміздегі барлық этнос үшін ортақ ұстанымдар. Сондықтан Наурыз мейрамы Қазақстанда халықтар достығының символы ретінде аталып өтеді. Өйткені, әрбір адам ұлты мен дініне қарамастан, бір-біріне құрмет көрсетіп, ынтымақтастықты арттыруға үлес қосады. Осылайша, Наурыз мейрамы Қазақстан халқы арасында достық пен бірлікті нығайтып, елдегі бейбітшіліктің одан әрі сақталуына ықпал етеді. Өз басым Наурыз мейрамын асыға күтемін, жаныма жақын, - деді депутат.
Наурыз мейрамын өзінің отбасы қалай атап өтетінін де айтты.
- Мереке күндері жұбайым наурыз көже пісіреді, ет асады. Орталық алаңға шығып, халықпен бірге мейрамдап, наурыз көже ішіп қайтамыз, - дейді.
Наурыз мейрамын асыға күтетін отандастарымыздың бірі - Қазақстан халқы Ассамблеясының өкілі, неміс этномәдени бірлестігінің мүшесі, «Возрождение» қоғамдық қоры қамқоршылық кеңесі төрағасының орынбасары Владислав Вебер.
- Өзім Солтүстік Қазақстан облысында, ауылда өскенмін. Бала күнімнен білем, Наурыз мейрамын ауыл болып тойлайтынбыз. Мектепте мерекелік концерт болатын, мәдениет үйінде түрлі іс-шаралар өтетін, одан бөлек ұлттық спорт түрлерінен жарыс болатын, ауыл шетіне шығып бәйге көретінбіз. Наурыз - Қазақстандағы барлық ұлтты біріктіретін мейрам, - дейді ол.
Ассамблея өкілі мерекелерді бөліп-жармайтынын айта келе, жанына жақын үш мейрамды атады.
- Рождество, Наурыз мейрамы және Пасха. Наурыз мейрамында біз қазақ достарымызға қонаққа барамыз, Пасхада олар бізге қонаққа келеді. Наурыз мейрамын достық көпірі десем болады. Бұл күні дәстүрлі түрде ет асамыз, бауырсақ пісіріледі, қымыз ішеміз. Сонымен қатар ұлттық киіммен мәдени іс-шараларға қатысамыз, - дейді Владислав Вебер.
Ұлттар ынтымақтастығын тереңдетуде Қазақстан халқы Ассамблеясының орны бөлек. Мемлекет басшысы айтқандай, Қазақстан халқы Ассамблеясы – мемлекеттілік пен бірліктің іргетасын нығайтатын негізгі институт. ҚХА - мемлекеттік және қоғамдық құрылым жүйесіндегі рөлі бойынша, ең алдымен мемлекеттік орган мен қоғамдық институттардың мүмкіндіктерін үйлестіретін этносаралық коммуникациялардың жалпыұлттық алаңы.
Айта кетейік, бүгінде елімізде 21 этномедиация орталық, 21 этномедиация кеңесі жұмыс істеп тұр. Сол сияқты этномедиация орталықтары мен кеңестерінің кадрлық құрамы қалыптастырылды, оның құрамына кәсіби медиаторлар, заңгерлер, педагогтер, психологтер, дінтанушылар, журналистер мен қоғамдық пікір көшбасшылары кірді.
Ірі қалалардан бөлек, ауылдық округ әкімдері, учаскелік инспекторлар, мектеп директорлары мен меңгерушілері, әрбір елді мекеннің имамдары, өңірлік этномедиация кеңестерінің мүшелері және Ассамблея өкілдері үшін этномедиацияның базалық негіздері бойынша семинар-тренингтер өткізіліп тұрады.
Еске салсақ, былтырдан бері Наурыз мерекесі елімізде «Наурызнама» дейтін атаумен он күн қатарынан тойлана бастады.
Әдеттегідей, биыл еліміздің түкпір-түкпірінде Наурыз мейрамы кең көлемде тойланып, жүздеген мәдени іс-шара өтеді.
