Назарбаев жапон бизнес «капитандарымен» кездеседі

ТОКИО. ҚазАқпарат - Қазақстан мен Жапония арасында шешілмеген еш мәселе жоқ. Бұл туралы бүгін Жапония Премьер-Министрі С.Абэмен кездескеннен кейінгі бірлескен мәлімдеме барысында ҚР Президенті Нұрсұлтан Назарбаев айтты, деп хабарлайды «ҚазАқпарат» ХАА тілшісі.

Елбасы Қазақстан мен Жапония арасында дипломатиялық қарым-қатынас орнаған сәттен достық әрі өзара түсіністік қалыптасқанын әрі екі мемлекеттік арасында шешілмеген мәселе жоқ екендігін баса айтты. Ядролық жарылыстан зардап шеккен еліміздің өңірлеріне жәрдем көрсеткен жапондық тараптың әрекетін жоғары бағалап, ризашылығын да білдірді,

«Әрине, екіжақты қарым-қатынастың негізгі локомативі экономика, өзара сауда болып саналады. Біз бұл мәселеге айрықша назар аудардық. Қазақстан Жапонияның Орталық Азиядағы ірі сауда-экономикалық  серіктесі, керісінше де солай. Әзірше, біздің тауар айналымымыздың көлемі 1,5 млрд. АҚШ долларын құрайды. Бұл біздің әлеуетіміздің деңгейіне сай келмейді. Сондықтан өзара іс-қимылымызды жоғары технология, ауыл шаруашылығы, атом энергиясы, автомобиль жасау және металлургия салаларын қоса алғанда көкжиегін кеңейте түсетін боламыз», - деді Назарбаев.

Сонымен қатар Мемлекет басшысы бүгін үкіметаралық комиссия отырысы өткенін, ал ертең Жапонияның "бизнес" капитандарымен кездесіп, екі елдің арасындағы нақты экономикалық байланыстарды талқылайтындығын атап өтті.