Нидерланд премьер-министрі отставкаға кетті
АСТАНА. KAZINFORM — Нидерланд премьер-министрі Дик Схоф отставкаға кететінін жариялады. Бұл шешім ультраоңшыл саясаткер Герт Вилдерс өзінің «Бостандық партиясын» үкімет құрамынан шығаратынын мәлімдегеннен бірнеше сағат өткен соң қабылданды, деп жазды Euronews.
Мұндай жағдай миграция мәселесіне байланысты келіспеушіліктерден туындады. Үкіметтегі коалиция Вилдерстің баспана беруді тоқтату және отбасыларды қайта қосу процесін тоқтату туралы жоспарын қолдаудан бас тартты. Вилдерс бұл әрекетін коалиция тарапынан қолдау болмағанына байланысты екенін түсіндірді.
«Бостандық партиясы сайлаушыларға тарихтағы ең қатаң баспана саясатын жүргізуге уәде берген, Еуропадағы осы саладағы ең қатаң елдердің біріне айналуды көздеген. Біз осы мәселеге қатысты жоспар ұсындық… Мен коалиция серіктестерінен, енді бұрынғы серіктестерімнен қолдау сұрадым. Олар қолдамады», — деді сейсенбі күні партия жетекшісі журналистерге.
Вилдерстің коалициядағы серіктестері бұл шешімін сынға алып, оны «түсініксіз» әрі «жауапсыз» деп атады. Партия көшбасшылары оның «өз мүдделерін ел мүддесінен жоғары қойып отырғанын» айтты.
Бұған дейін Нидерландтағы «Бостандық партиясының» жетекшісі Герт Вилдерс миграцияны бақылау мәселелеріне байланысты келіспеушіліктер туындаған соң коалициядан шығатынын мәлімдеген болатын.
