Нигерияда содырлар мешітке шабуыл жасап, 27 адамды атып кетті

АСТАНА. KAZINFORM – Нигерияның Кацина штатындағы мешітке намаз уақытында жасалған қарулы шабуылда кем дегенде 27 адам қаза тапты, деп хабарлайды Al Jazeera. 

Жергілікті тұрғындардың айтуынша, оқиға Малумфаши ауданындағы Унгуван Мантау ауылында таң намазы кезінде болған. Қарулы адамдар жергілікті уақыт бойынша сағат 04:00 шамасында мешіт ішіне оқ жаудырған. Шабуыл үшін жауапкершілікті әзірге ешкім мойнына алған жоқ.

Кейінгі жылдары мұндай шабуылдар Нигерияның солтүстік-батыс және солтүстік-орталық аймақтарында жиі орын алуда. Бұл аймақтарда малшылар мен фермерлер жер мен су ресурстарының шектеулілігіне байланысты жиі қақтығысады. Мешітке жасалған шабуылдан зардап шеккендер де бар.

Болашақ шабуылдардың алдын алу үшін Унгуван Мантау аймағына армия мен полиция күштері орналастырылды. Қарулы топтар жауын-шашын кезінде егістік алқабына тығылып ауылдарға жиі шабуыл жасайды.

Маусым айында Нигерияның Бенуэ штатында болған терактіде 100-ден астам адам қаза тапқан болатын. Amnesty International үкіметті «күнделікті қантөгісті» тоқтатуға шақырды. 

Еске сала кетейік, Нигериядағы қарулы шабуылда 34 сарбаз қаза тапты.