Никушор Дан Румыния президенті сайлауында жеңіске жетті

АСТАНА. KAZINFORM — Румынияда өткен президент сайлауының екінші кезеңінде ел астанасы Бухаресттің қазіргі мэрі, еуропашыл тәуелсіз кандидат Никушор Дан жеңіске жетті, деп хабарлайды ТАСС.

Ол 54,17% дауыс жинады, ал оның қарсыласы — ұлтшыл бағыттағы "Румындарды біріктіру альянсы" партиясының жетекшісі Джордже Симион 45,83% дауысқа ие болды. Бұл мәліметтер бюллетеньдердің 98,56%-ы есептелгеннен кейін Румынияның Тұрақты сайлау әкімшілігі сайтына жарияланған.

Румыниялық бұқаралық ақпарат құралдары Никушор Данды сайлаудағы жеңімпаз деп жариялады, өйткені әлі есептелмеген 850 мың дауыс қалғанымен, кандидаттар арасындағы айырмашылық 898 мың дауысты құрап отыр.

Данның сайлау штабы маңында бірнеше мыңдаған жақтасы жиналып, «Никушор!», «Еуропа!», «Румыния!» деп ұрандап жатыр. Бухаресттің Элизабет бульварында көлік қозғалысы уақытша тоқтатылған — болашақ президент халыққа үндеу жасайды деп күтіледі.

Бұл сайлау қайта өткізілген президенттік сайлау болды. Жоспарланған негізгі сайлау 2024 жылдың қарашасында басталған еді, бірақ Румыния Конституциялық соты оны тоқтатуға шешім қабылдады.

Бірінші турда (2024 жылғы 24 қараша) ұлтшыл кандидат Кэлин Джорджеску ең көп дауыс жинаған болатын. Алайда оның сайлау кампаниясын заңсыз қаржыландырғаны, дауыс беру жүйесіне қарсы хакерлік шабуылдар сияқты себептермен сайлау нәтижесі жойылды. Бұл айыптаулардың кейбіреуі дәлелденбегенімен, Конституциялық сот бұл шешімді қабылдады.

Соттың бұл ерекше әрі бұрын-соңды болмаған шешімі Румынияда да, шетелде де үлкен дау туғызды. Дегенмен, ел үкіметі сот шешімін ескеріп, қайта сайлауды 2025 жылғы 4 және 18 мамырға белгіледі.

Бұған дейін Румынияның Конституциялық сотына 4 мамырдағы сайлау қорытындысын жою туралы өтініш жіберілгені мәлім болды.