Норвегияда Екінші дүниежүзілік соғыс кезіндегі алып бомба табылды
АСТАНА. KAZINFORM — Норвегияның Элверум қаласында Екінші дүниежүзілік соғыс кезінде жарылмаған авиациялық бомба анықталды, деп жазады АЗЕРТАДЖ.
Қазір оны залалсыздандыру бойынша операция жүргізіліп жатыр.
АЗЕРТАДЖ мәліметінше, 1940 жылы 11 сәуірде фашистік Германия тастаған 250 келілік бомба Тернингмоэн әскери полигонынан табылды. Бомбаның жартысы жарылғыш заттан тұратындықтан, әрі оның тұрақсыз күйіне байланысты бомбаны қауіпсіз түрде жылжыту мүмкін емес болды.
— Аяқ астынан жарылып кету қаупі бар. Бомбаның детонаторлары қозғалысқа, дірілге және жоғары температураға сезімтал, — дейді жарылғыш заттар бойынша маман Крис Таарнебю Маукенг.
Қауіпті тапсырманы орындау үшін Норвегия әскерилері соғыстан қалған оқ-дәрілермен жұмыс істеуде тәжірибесі мол бельгиялық сарапшыларды тартты.
Қауіпсіздік мақсатында бомба табылған жерден 250 метр радиустағы тұрғындар эвакуацияланды. Сондай-ақ бір жарым шақырым жер шамасында тұрғандарға үйден шықпауға кеңес берілді.
