Нұралы Әліп «Манчестер Юнайтедке» ауыса ма - ресми жауап
Футболдан Қазақстан құрамасының қорғаушысы Нұралы Әліптің өкілдері оған «Манчестер Юнайтед» командасы тарапынан қызығушылығы жөнінде пікір білдірді, деп хабарлайды Kazinform.
Қазақстандық БАҚ беттерінде еуропалық көшбасшы команда скауттарын ұлттық құраманың Словенияға қарсы матчына жібергені жөнінде ақпарат таратқан еді. Бұдан кейін жанкүйерлер ағылшындық клубтың Instagram-аккаунтына кең көлемде пікірін жазды.
«Бұл жөнінде агенттікке ешкім жүгінген жоқ, қалғаны авторлардың ар-ожданына байланысты... Қазіргі уақытта ол «Зенитке» тиесілі, клубтың чемпион атануына күш салып жатыр», - деп жазылған аталған хабарламада.
23-жастағы Нұралы Әліптің трансферлік бағасы 2 миллион евроға бағаланып отыр. Оның «Зенитпен» келісім-шарты 2025 жылдың 30 маусымына дейін жарамды.
Еске салсақ, Қазақстан құрамасы 20 қарашада Еуропа чемпионаты іріктеу сатысындағы оныншы турда Словенияға қарсы ойын өткізіп, қарсыласына 1:2 есебімен жол берді.
Енді ел құрамасы Ұлттар лигасы плей-офф сатысында Грекиямен шеберлік байқасады.
