Нұртай Сабильянов әуе көлігі саласындағы мәселелерді атады

АСТАНА. KAZINFORM – Мәжілістегі елдің көлік-логистикалық әлеуетін дамытуға арналған Үкімет сағатында депутат Нұртай Сабильянов әуе көлігі саласындағы мәселелерді атады.

- Әуе көлігі саласында мынадай мәселелер бар: әуежай жабдықтарының, техникалық құралдары мен инфрақұрылымының ескіруі; авиаотын құнының жоғары болуы; тиімсіз жоспарлау; ұшақтардың жетіспеушілігі. Бұл мәселелерді депутаттар жиі көтеруде. Әсіресе, Air Astana мен FlyАrystan-ның жиі кешігуі, билет құнын қайтаруда тұтынушылар құқығының бұзылуы үнемі болып жатыр. Сондықтан осындай мәселелерге министрлік тарапынан шара қолданылуы керек, - деді Нұртай Сабильянов.

Оның атап өтуінше, депутаттар еліміздің көлік-логистика әлеуетін дамыту мәселелерін бірнеше мәрте көтерген.

 - Үкімет пен жергілікті атқарушы органдардың атқарып отырған шаруасын көріп отырмыз. Алайда қазіргі жағдайда бұл жеткіліксіз болып тұр. Кешенді тәсіл және сындарлы ведомствоаралық өзара іс-қимыл қажет. Тек жұмыла жұмыс істеген кезде ғана сапалы инфрақұрылым құрып, осы бағытқа салынған инвестицияның тиімділігін қамтамасыз ете аламыз, - деді Мәжіліс депутаты.

Бұған дейін әртүрлі көлік түрлерінің технологиялық біртұтастығын қамтамасыз ететін көлік-логистика орталықтарын құру қажеттігін жазған едік.