Нұртілеу мен Лавров Қырғызстанда не талқылады
АСТАНА. KAZINFORM – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу мен Ресей Федерациясының Сыртқы істер министрі Сергей Лавров Қырғызстанның Чолпон-Ата қаласында Ұжымдық қауіпсіздік шарты ұйымы Сыртқы істер министрлері кеңесінің отырысы қарсаңында кездесті. Бұл туралы ҚР СІМ баспасөз қызметі хабарлады.
ҚР СІМ мәліметінше, тараптар саяси және экономикалық салалардағы, транзиттік-транспорттық және энергетикалық бағыттардағы Қазақстан-Ресей ынтымақтастығының қазіргі жай-күйі мен даму перспективаларын талқылады.
Сонымен қатар екі елдің халықаралық ұйымдар мен өңірлік интеграциялық бірлестіктер аясындағы өзара іс-қимыл мәселелері сөз болды.
Әңгіме барысында аймақтық және халықаралық күн тәртібіндегі өзекті мәселелер бойынша пікір алмасылып, жоғары және аса жоғары деңгейлерде жоспарланған екіжақты іс-шаралар кестесі келісілді.
Бұған дейін хабарланғандай, бүгін Чолпон-Атада Қырғыз Республикасының сыртқы істер министрі Жээнбек Кулубаевтың төрағалығымен ҰҚШҰ-ға мүше мемлекеттер сыртқы істер министрлері кеңесінің кезекті отырысы өтеді.
