Облыс әкімі қаладағы құрылыс нысандарының жұмысымен танысты-Қызылорда

ҚЫЗЫЛОРДА. ҚазАқпарат-Бүгін Қызылорда облысының әкімі Қырымбек Көшербаев қаладағы бірқатар әлеуметтік нысандарды аралады. Алдымен облыстық көпсалалы балалар ауруханасының құрылыс жұмыстарымен танысты,-деп хабарлайды ҚазАқпарат облыстық әкімдікке сілтеме жасап.

Құрылысы 2014 жылы басталған көпсалалы балалар ауруханасы биыл пайдалануға берілмек. 6,8 гектар аумақты алып жатқан ғимарат 4 негізгі блоктан тұрады және табиғи газбен, қажет жағдайда сұйық отынмен жұмыс істейтін станция орнатылады. Заманауи үлгідегі ауруханада 12 бөлімше жұмыс істейді. Оның ішінде хирургия, аллерголог, уролог, нейротравматолог бөлімдері бар. Құрылыс жұмыстары аяқталған соң жедел-жәрдем мәселелері шешіледі. 

Қызылорда қаласында жалпы аумағы 5 гектар жерге, сыйымдылығы 200 автобусқа арналған жаңа үлгідегі автобус паркі салынуда. Автопаркте қала көлемінде қызмет көрсететін үлкен сыйымдылықтағы автобустарға арналған тұрақтар, жанармай бекеті, көлік жуу алаңы қарастырылған.

Қалада Жаппасбай батыр көшесінде 580 пәтерлі 12 көпқабатты үйдің құрылысы жүргізілуде. «Нұрлы жол» мемлекеттік бағдарламасы аясында салынып жатқан көпқабатты тұрғын үйлер жыл соңына дейін ел игілігіне табысталады.

Талсуат ауылдық округіндегі 300 орындық психоневрологиялық интернат І және ІІ топтағы мүгедектерге арнайы әлеуметтік көмек көрсетуге арналған. Нысан 8 блоктан тұрады. Онда дәрігерлердің қабылдау, физиоемдеу және денешынықтыру, мәдени-спорттық мақсаттағы сондай-ақ, емдеу-сауықтыру өндірістік шеберханаларына арналған бөлмелер бар. Нысанның құрылысымен мердігер компания «Абу Сер» ЖШС айналысуда.