Облыс басшысы әлемнің төрт дүркін чемпионы Е.Байбатыровты қабылдады

ОРАЛ. 18 қараша. ҚазАқпарат /Елжан Ералы/ - Облыс әкімі Бақтықожа Ізмұхамбетов Лит­ваның Вильнюс қаласында өткен самбодан әлем чемпионатының жеңімпаз-жүлдегерлерін қабылдады.

Аталмыш біріншілікте батысқазақстандық Ерболат Байбатыров 57 келі салмақ дәрежесінде үздік шығып, төртінші рет әлем чемпионы атанған болатын. Ал 52 келіде Медет Оңдағанов күміс жүлдеге ие болса, әскери самбодан Бауыржан Ғұмаров қола медальді еншілеген еді.

Облыс басшысы өз сөзінде Елбасымыз Нұрсұл­та­н Назарбаевтың спортқа айрықша көңіл бөліп, Үкіметке, облыс басшыларына, атқарушы органдарға бұл мәселені арнайы тапсырып отырғанын атап өтті.

Облыс басшысы құттықтау сө­зінен кейін жеңімпаздарға ақ­ша­лай сый ұсынды. Бұдан соң әлемдік біріншіліктерде өнер көрсетіп жүр­ген спортшыларымыз бен ел спор­тының кешегісі мен бүгінгісі жайында емен-жарқын әңгіме өр­біді. Қабылдауда Е.Байбатыров спортшылар атынан облыс әкіміне алғысын білдірді.

Вильнюстегі белдесуде Ерболат Байбатыров алдымен жапон палуанын 10:0 есебімен ұтып, жар­тылай финалда түркімендік сам­бошыны 5:0 есебімен жең­ген. Ал ақтық кездесуде грузи­н палуа­нының жауырынын жер иіскетіп, топ жарды. Өткен жыл­дан бастап дзюдо күресіне бет­ бұрған Ерболат желтоқсанда Ко­реяда өтетін әлем кубогы жарысына қатыспақ.