Облыстық ІІД басшылары Үкімет отырысында есеп беретін болды
АСТАНА. ҚазАқпарат - Облыстық ішкі істер департаменттері мен жергілікті полиция бастықтары ҚР Үкіметі отырыстарында атқарған жұмыстары жайында есеп беретін болады. Бүгін ҚР Үкіметі отырысында Премьер-Министр Бақытжан Сағынтаев осындай тапсырма жүктеді, деп хабарлайды ҚазАқпарат.
«Біз ішкі істер департаменттері бастықтарын ешқашан тыңдаған емеспіз. ІІД бастықтары осында келіп, баяндайтын болсын. Қазір жергілікті полиция бар, олар да осы жерге келіп өздері атқарып жатқан жұмыстары жайында айтсын», - деді Үкімет басшысы. Осы ретте Б.Сағынтаев Нью-Йорктегі қылмыс деңгейін төмендету бағытында атқарылған жұмыстарды Президент Нұрсұлтан Назарбаев үнемі мысалға келтіретіндігін еске салып өтті.
«Таяуда ғана тек қаланың немесе облыстың ғана емес, Нью-Йорктің әр ауданында қылмыстың не жоғары не төмен екендігі көрсетілген мобильді қосымша бар екендігін оқыдым. Бұл қосымшаны бизнес жиі қолданады. Мәселен, қонақ үйлер өздерінің жарнамаларында қонақ үйдің Нью-Йорктің қандай да бір ауданында орналасқанын және ол жақта қылмыс деңгейі нөлге тең екендігін көсретеді. Сондықтан туристердің барлығы сонда барады», - деді ол.
Сонымен қатар Үкімет басшысы Нью-Йорктің жайлы аудандарындағы баспана бағасының да күрт жоғарылайтындығын айтты.
