ОҚО-да Сырдария өзенінде суға кеткен бойжеткенді төртінші тәулік бойы іздестіріп жатыр
ОҚО ТЖД құтқару жасағының ресми өкілі Павел Вишениннің баяндауынша, Байырқұм ауылынан хабарлама 9 тамыз күні сағат 15:17-де келіп түскен. Адамдар Арыс ауданындағы Сырдария өзенінде 1986 жылғы бойжеткеннің суға батып кеткенін хабарлады. Оны іздеу жұмыстарына 4 адам мен 1 техника бірлігі жұмылдырылған. Іздеу жұмыстары әлі де жүргізіліп жатыр.
Павел Вишениннің хабарлауынша, сол күні оларға Түлкібас ауданындағы Сартор ауылындағы көлде 1980 жылғы ер адамның батып кеткені туралы хабарлама келіп түскен. Оның да осы ауданның тұрғыны екені белгілі болды. Ер адамды іздеу жұмыстарына 5 адам мен 1 техника жұмылдырылған. Ер адамның денесі 10 тамыз күні таңертең табылды.
Сондай-ақ, 10 тамызда құтқарушыларға Сырдарияға Шардара қаласының тұрғыны, 14 жасар қыз бала батып кеткені туралы хабарлама келіп түскен. Телефон хабарламасы түскеннен кейін 15 минут өткен соң оны іздеу жұмыстарына құтқару жасағының 5 қызметкері мен 1 техника бірлігі аттанған. Бойжеткеннің денесі 35 минуттан кейін табылды.