ОҚО: Тәуелсіздік күніне орай 24 әлеуметтік нысан ашылды
Бұл туралы Оңтүстік Қазақстан облыстық әкімдігінің баспасөз қызметінен хабарланды.
«Алдымен Борлысай ауылдық округіндегі мыңнан астам тұрғыны бар Қошқарата елді мекенінде фельдшерлік акушерлік пункт пайдалануға берілді. Шараға арнайы қатысқан аудан әкімі Батырбек Көшербай ауыл тұрғындарын еліміздің ұлық мерекесімен құттықтады. Биылғы жылдың мамыр айында басталған құрылыс жұмыстары жеті айда толық аяқталған. Бұл үшін облыстық қазынадан 32 млн. теңгеге жуық қаржы қаралған. Медициналық нысан қажетті құралдармен жабдықталған», делінген баспасөз баянында.
Сонымен қатар, осы күні Ақбастау елді мекенінде пайдалануға берілген ауылдық әкімшіліктің жаңа ғимараты ауыл тұрғындарын ерекше қуантқан. Қазынадан 26 млн. қаржы жұмсалып, тоқырау жылдары жекеменшікке өткен ғимарат 3 млн. қаржыға кері қайтарылған. Екі қабатты нысанға 23 млн. теңгеге күрделі жөндеу жүргізілген. Енді Ақбастаудағы жергілікті билік жайлы да сәулетті ғимаратта ауыл тұрғындарына сапалы қызмет көрсетпек.
Бұдан бөлек, Тәуелсіздік күніне орай тамаша тарту болған Жамбыл елді мекеніндегі 150 орындық еңселі мәдениет үйі ауыл жастары мен жасөспірімдердің бос уақытын тиімді өткізуге ықпал етеді. Облыстық қазынаның 165 млн. қаржысына бой көтерген ғимарат құрылысы бір жылда аяқталған. Мәдениет үйі қажетті құрылғылармен жабдықталған. Жаңа жылдан бастап, іске кірісетін мұндағы үйірмелер ауыл тұрғындарына мәдени-рухани қызмет көрсетеді деп күтілуде. Мәдениет үйінің ашылу салтанатына жиылған жамбылдықтар ел Тәуелсіздігінің 23 жылдығына арналған салтанатты жиынға қатысып, мерекелік көңіл күймен тарқасты.