ОҚО: «Жұмыспен қамту-2020» бағдарламасы аясында 2 мыңға тарта адам кәсіпкерліктің негізі бойынша оқытылды

АСТАНА. 8 қараша. ҚазАқпарат - Бүгін Оңтүстік Қазақстан облысы облыстық жұмыспен қамтуды үйлестіру және әлеуметтік бағдарламалар басқармасының басшысы бұқаралық ақпарат құралдары өкілдеріне арналған брифинг өткізді. Бұл туралы Оңтүстік Қазақстан облысы әкімдігінің баспасөз қызметінен хабарланды.

Басқарма басшысы Мұхит Әлінің айтуынша, биылғы жылы «Жұмыспен қамту-2020» бағдарламасына қатысушыларының ішінен 1991 адам кәсіпкерліктің негіздеріне оқуға жіберіліп, 1003 бағдарламаның қатысушысы шағын несие алды. Олардың 642-і өз ісін ашса, 351-і қаражаттарды өз ісін дамыту үшін жұмсады. Бағдарламаның 2-ші бағытының қатысушыларымен қосымша 909 жаңа жұмыс орындары ашылды. «Жұмыспен қамту-2020» жол картасы бағдарламасы бойынша кәсіби оқыту мен жұмыспен қамтудың нәтижелі жүйесін қалыптастыру үшін 2013 жылы 2179 адам оқуға жіберілді. Кәсіби оқуды жалпы 4287 адам аяқтап, оның 4188-і экономиканың түрлі салаларына тұрақты жұмысқа орналасты. Тұрмыс деңгейі төмен азаматтарға төмен пайызбен несие алуға мүмкіндіктер де қарастырылған. Бағдарламаның 2-ші бағыты шеңберінде өз бетінше жұмыспен айналысушылар, жұмыссыздар мен табысы аз қатарындағы адамдарға ауылды жерлерде кәсіпкерлікті дамытуға мемлекеттік қолдау көрсету қарастырылып, 2011 жылдың екінші жартыжылдығынан бастап кепілдемелік мүлікке сәйкес 3 млн. теңгеге дейін, 5 жыл мерзімге 6,5-6 пайыздық шағын несие берілуде», - дейді басқарма басшысы.