ОҚО: Жылына 25 млн. кірпіш шығаратын зауыт іске қосылды

АСТАНА. ҚазАқпарат - Бүгін Оңтүстік Қазақстан облысы Ордабасы ауданында облыс әкімінің орынбасары Сапарбек Тұяқбаевтың қатысуымен индустрияландыру бағдарламасы аясында жаңа кірпіш зауытын іске қосты. «Агро V» компаниясына қарасты кірпіш зауыты жылына 25 миллион кірпіш шығарады. Бұл туралы ОҚО әкімдігінің баспасөз қызметінен хабарланды.

Қысы-жазы жұмыс жасайтын жаңа зауытта 50 жұмыс орны ашылған. Зауыт директоры Нұралы Әбішевтің айтуынша, технологиялық құрал-жабдықтар арнайы тапсырыспен Қытайдан алынған. Жабдықтар көп компонентті қоспалардан жоғары сапалы өнім шығаруға және толығымен автоматтандырылғаны есебінен кірпіштердің геометриялық пішіндерін сақтауға мүмкіндік береді. Сондай-ақ, кірпіштерді күйдіруге арналған пештің елімізде баламасы жоқ. «Агро V» ЖШС-і қоршаған ортаға зиян тигізбейді, себебі өндірісте пайда болған қалдықтар қайта өңделіп, олардан өнім шығарылатын болады.

«Кәсіпорынға «Бизнестің жол картасы - 2020» бағдарламасы аясында инфрақұрылым жүйелері тартылған және алынған несие бойынша пайыздық мөлшерлеме субсидияланған. Облыста үдемелі индустриалды-инновациялық даму мемлекеттік бағдарламасы аясында Индустриаландыру Картасына жалпы құны 705,2 млрд. теңге және 21 мыңнан астам жұмыс орнын ашуға мүмкіндік беретін 170 жоба енгізілген», - деді облыс әкімінің орынбасары Сапарбек Тұяқбаев.