Оқулық сатып алуға қатысты жұртты дүрліктіруге ата-аналардың өздері кінәлі - БҒМ

АСТАНА. ҚазАқпарат - Мектептерде оқулық сатып алуға қатысты жұрттың дүрлігуін тудыруға ата-аналардың өздері кінәлі. Осыған байланысты, бүгін Орталық коммуникациялар қызметiнде өткен брифингте ҚР Бiлiм және ғылым министрлiгi Бiлiм беру және ғылым саласындағы бақылау комитетiнiң төрағасы Саят Нүсiпов ата-аналарға оқулықтарды ертерек сатып алуға кеңес береді. Брифингте өңiрлердегi мектептердiң оқу жылына дайындығы туралы мәселе қаралған болатын.

Комитет басшысы брифинг барысында оқулықтардың қорландыру циклына сәйкес жаңартылатынын еске салып өтті. Оның сөзіне қарағанда, бір оқулық төрт жылда бір рет жаңарады. «Сосын үш-төрт жыл барысында оқулық ескіріп, оның сапасы ата-аналарды қанағаттандырмайды. Сондықтан да ата-аналар балаларының жаңа оқулықпен оқығанын қалайтын шығар. Бұнда да ата-аналардың психологиясына көп нәрсе байланысты. Өйткені, «қыс шананы жаз сайла» деген қағидатты қаперге ала бермейміз. Сосын жазғы демалыста босаңсып жүріп, тек тамыздың 31-і мен қыркүйектің 1-іне қарай жапатармағай жүгіреміз, соның салдарынан ұзынсонар кезектер қалыптасады, жұрт дүрлігеді», - дейді С.Нүсіпов.

Осыған байланысты комитет басшысы жергілікті басқармаларға ата-аналарды оқулықтар тізімі туралы ертерек ескерту жөнінде тапсырма берген. Бұдан бөлек, ондай дүрлігуді тудырмас үшін биыл кітапханалардағы оқулықтарды тамыздың 10-ынан бастап үйлестіру бойынша акция ұйымдастырылатын болады.