«Оқжетпес» пен «Шахтер» тең нәтижеге қанағат білдірді
Екінші ойын күнінің алғашқы кездесуінде Көкшетаудың «Оқжетпесі» мен Қарағандының «Шахтері» шеберлік байқасты.
Бірінші кезеңде командалар бір-бірінің қақпасына жиі шабуыл ұйымдастырды. Дегенмен таблодағы есеп өзгерген жоқ.
Екінші кезеңде де футболшылар гол соғатын мүмкіндік іздеді. Олардың тепкен добы көздеген нысанаға дәл жетпей жатты. Ойынның 92-минутында «Оқжетпес» ойыншысы Иван Брикнер мергендік танытса, оған 99-минутта «Шахтер» сапынан Роджер Каньяс пенальтиден бір голмен жауап қайырды.
Осылайша командалар 1:1 есебіне қанағат білдірді.
Енді 16:00-де «Атырау» мен «Ақсу» (Павлодар облысы), «Тобыл» (Қостанай) мен «Ақтөбе», 18:00-де «Қайрат» (Алматы) пен «Ордабасы» (Шымкент), 20:00-де «Қайсар» (Қызылорда) мен «Астана» жасыл алаңға шығады.
Еске салсақ, 22 сәуірде «Мақтарал» өз алаңында «Жетісудан» жеңіліп қалса , «Қызылжар» мен «Каспий» 1:1 есебіне қанағат білдірді.
Ал сегізінші тур ойындары 6 және 7 мамыр күндеріне белгіленген.