Олимпиада: Хоккейден ерлер арасында қола жүлдегер анықталды
НҰР-СҰЛТАН. ҚазАқпарат - Қытайдың Бейжің қаласында өтіп жатқан қысқы Олимпиада ойындарында шайбалы хоккейден ерлер арасында қола жүлдегер анықталды, деп хабарлайды ҚазАқпарат тілшісі.
Қола жүлде үшін Словакия және Швеция құрамалары шеберлік байқасты.
Ойын барысында словакиялық Юрай Слафковски 23 және 58-минуттарда мергендік танытты. Ал Самуэль Такач – 33, Павол Регенда 59-минутта көздеген нысанадан мүлт кеткен жоқ.
Осылайша Словакия қарсыласынан 4:0 есебімен басым түсіп, өзінің тарихында тұңғыш рет қола медаль иегері атанды.
Енді 20 ақпанда финалда Ресей мен Финляндия мұзайдынға шығады.
Еске салсақ, бұған дейін Ресей (КСРО-ны қоса есептегенде) 9 алтын, 2 күміс, 2 қола медаль алды. Ал Финляндия 2 мәрте күміс жүлдегер атанса, 4 мәрте қола жүлдеге қол созды.
