Оман Ормуз бұғазында уақытша дәліз ашты
АСТАНА.KAZINFORM - Оман Халықаралық теңіз ұйымымен (IMO) үйлестіре отырып, Ормуз бұғазы арқылы уақытша теңіз дәлізін құрғанын жариялады, деп хабарлайды Gulf News.
Уақытша дәлізге IMO және Оман билігі жариялаған координаттар бойынша барлық кеме кіре алады.
Оман бұл шешім бұғаздың халықаралық сауда, жаһандық энергетикалық ағындар және жалпы экономика үшін маңыздылығын мойындау мақсатында қабылданғанын мәлімдеді.
Мәлімдемеге сәйкес, бұл бастама жақында жасалған дипломатиялық күш-жігер мен АҚШ және Иран арасындағы қол жеткізілген келісімдерге сәйкес келеді.
Мәлімдемеде сондай-ақ Сұлтанаттың халықаралық құқық пен теңіз құқығына берілгендігі расталды. Бұл бұғаз арқылы транзиттік алымдарсыз жүзу еркіндігіне кепілдік береді.
Оман уақытша бағыттың барлық кеме үшін қолжетімді болуын қамтамасыз ету және осы стратегиялық маңызды су жолы арқылы қауіпсіз және реттелген транзитті қолдау үшін IMO-мен үйлестіру жұмыстарын жүргізді.
Естеріңізге сала кетейік, Иран бұған дейін Ормуз бұғазында қақтығыс болдырмау үшін байланыс арнасын құруға келіскен болатын.
