Оңтүстік Қазақстан облысының үкіметтік емес ұйымдары Елбасының саясатын толық қолдайды
Форумға қатысушылар Елбасы Нұрсұлтан Назарбаевтың «Дағдарыс арқылы жаңару мен дамуға» атты Қазақстан халқына Жолдауының жүзеге асырылу барысын талқылады және отандастарына мемлекеттік саясатқа қатысты өз ұстанымдарын білдірген үндеу таратты.
«Біз бүгінгі әлемдік экономикалық дағдарыс жағдайында Елбасы жүргізіп отырған сарабдал саясатты, Қазақстан халқын әлеуметтік қолдау мақсатында қабылданған бағдарламалар мен олардың жүзеге асырылу үдерістерін толық қолдаймыз», - деп атап көрсетілген үндеуде.
Жол картасы аясында Оңтүстік Қазақстан облысында 25,7 миллиард теңге соманың 754 инвестициялық жобасы жүзеге асырылуда. Оның ішінде 324 тұрғын үй-коммуналдық шаруашылығы және 285 әлеуметтік сала нысандарында жөндеу жұмыстары жүргізілуде. «100 мектеп, 100 бағдарлама» президенттік бағдарламасы бойынша, аймақта 39 мектептің және екі аурухананың құрылысы салынып жатыр.
Форумға қатысушылар өз үндеулерінде сондай-ақ, әлемдегі қауіпсіздік мәселесіне өз көзқарастарын білдірді. «20 жыл бұрын Нұрсұлтан Назарбаев әлемдік қоғамдастықтың алдында жоғары жауапкершіліктің үлгісін көрсетіп, Семейдегі ядролық полигонды жою туралы шешім қабылдаған еді. Әлемдегі төртінші ядролық арсеналдан бас тарту туралы да Елбасының шешімі бұрын-соңды тарихта болмаған жағдай»,- деп мәлім етеді үкіметтік емес ұйымдардың өкілдері өз үндеулерінде.
Форумға қатысушылар тамыздың 29-ын Ядролық қару-жарақтан бас тартудың дүниежүзілік күні деп жариялау туралы Нұрсұлтан Назарбаевтың бастамасын қолдады.