Оңтүстік Қазақстанда көктемгі су тасқыны қаупі сейілді
Бұл туралы Шардара су қоймасы мен Көксарай су реттегішін əуеден бақылап, Сырдария, Арыс өзендерінің аңғарын шолып шыққан облыс әкімі Жансейіт Түймебаев мәлім етті, деп хабарлайды ҚазАқпарат ХАА тілшісі.
Өңірдегі өзен аңғарлары мен су қоймаларының жай-күйімен танысқан аймақ басшысы Отырар ауданында Түркістан және Арыс қалалары мен Шардара, Отырар ауданы əкімдері мен облыстық деңгейдегі сала жетекшілерінің қатысуымен көшпелі жиын өткізді. Су тасқынына қарсы атқарылып жатқан жұмыстардың барысын тыңдады. Қазіргі таңда тасқын судың алдын алу үшін Шардара, Отырар, Арыс аудандары мен Түркістан қаласы аумағында ұзақтығы 4300 метр уақытша қорғаныс дамбалары тұрғызылып, 44500 дана құм толтырылған қаптар қойылды. Осы жұмыстарға жергілікті атқарушы органдардан - 400, төтенше жағдайлар департаментінен 195 адам және 72 техника жұмылдырылған. Облыстық Төтенше жағдайлар департаментінің бастығы Нұрболат Дербісовтің айтуынша, 467 адам, 60 арнайы техника және 10 жүзу құралдары дайындыққа келтірілген. Бұл жергілікті атқарушы органдарымен Сырдария өзенінің арнасына Өзбекстан Республикасынан секундына жалпы көлемі 1500-ден 2000 м3/сек дейін су тасталғанда болуы мүмкін су тасқыны жағдайына есептелген. Бір жарым ай көлемінде жүргізілген ауқымды жұмыстардың нәтижесінде облыс көлемінде елді мекендерді су басулары орын алмай, үлкен су қауіпсіз өткізілуде.
Су тасқынына қарсы шаралардың мән-жайы талқыланған жиында аудан әкімдері Сырдария өзеніндегі және Көксарай реттегішінде толған суды ауыл шаруашылығы бағытына қолдануға мүмкіндік беретін жобаларымен таныстырды. Нәтижесінде суармалы жерлерді ұлғайту көзделуде.
Тасқын судың алдын алу бойынша тиісті шараларды тыңғылықты орындауды жүктеген облыс басшысы ұсынылған жобаларды кеңінен талқылап, жасанды су қоймаларды жасау үшін аэроғарыштық түсірілім әдістері арқылы зерделеуді және бұл жұмысқа ғалымдарды да жұмылдыру қажеттігін атап, нақты тапсырмалар берді.
«Келешекте су тасқынының болдырмау және көктемгі мезгілдегі тасқын суларды тиімді пайдалану үшін табиғи ыңғайлы сайларды тоған ретінде қолдануға, тиісті бөгеттерді салуға қала, аудан әкімдері мен тиісті мекемелер нақты ұсыныстар енгізсін.Тасқын болуы мүмкін өзен аңғарларына жақын маңға қора салынбауын да қадағалау қажет»,- деді Жансейіт Қансейітұлы
Айта кетейік, аймақтағы Арыс, Келес, Бадам үш ірі өзені мен 117 кіші өзен таудан бастау алып, барлығы елді мекендер арасымен өтіп, республикааралық Сырдария өзеніне барып құяды. Төтенше жағдайлар департаментінің мамандары «Қазгидромет» РМК орталығынан күнделікті мәліметтер алып, облыс аумағындағы көктемгі су тасқыны жағдайына мониторинг, болжау жұмыстарын тоқтаусыз атқаруда.
