Оңтүстік жұртшылығы Наурыз мейрамы аясындағы «Береке күнін атап өтті

АСТАНА. 18 наурыз. ҚазАқпарат - Наурыз мейрамына арналған іс-шаралар жоспарына сәйкес 17 наурыз Оңтүстік Қазақстан облысында «Береке күні» деп аталды. Осы күні өңірдегі балалар үйлерінің тәрбиеленушілеріне, қарттар үйіндегі қарияларға және аз қамтылған отбасыларға қайырымдылық шаралары ұйымдастырылып, көмектер көрсетілді. Бұл туралы облыстық әкімдіктің баспасөз қызметінен хабарланды.

Наурыз береке-бірліктің, қайырымдылықтың, кешірімнің мейрамы. Ата-бабаларымыз бұл мейрам кезінде жарлы-жақыбайға қайырымдылық жасауды да ұмытпаған. Қазақтың байлары «шүлен тарату» дәстүрін жасап, кедей-кепшікке мал-мүлік, бұйым үлестіріп, тегін ас таратқан. Бұл халқымыздың жомарттығының көрінісі саналатын дәстүр.

«Осыған орай, ОҚО облыстық басқармалар мен аудан, қала әкімдіктері Арыс қаласындағы Т.Тәжібаев атындағы, Төлеби ауданындағы №2, Шымкент қаласындағы №3, Сайрам ауданындағы №4 балалар үйлері мен Сайрам ауданындағы «Бауыржан» отбасылық негіздегі балалар үйінің тәрбиеленушілерін, облыстық қарттар мен мүгедектерге арналған медициналық әлеуметтік мекемесіндегі азаматтарды Наурыз мерекесімен құттықтап, сый-сияпат жасады. Сондай-ақ, Шымкент қаласы әкімдігінің бастамасымен Оңтүстіктегі қалталы кәсіпкерлер аз қамтамасыз етілген мыңға жуық отбасыға қайрымдылық көмек көрсетті», делінген баспасөз баянында.

«Береке күніндегі» аталмыш шаралар ата-баба дәстүрін ұлықтап, ел бірлігін бекемдеуге септігін тигізеді. Қоғамымызда мейірім мен шапағаттың, адамгершілік пен ізгіліктің үстем болуына үндейді.