Оңтүстік Корея президентінің ұшағындағы 168 жолаушының төлқұжат дерегі желіге тарады
АСТАНА. KAZINFORM — Оңтүстік Корея полициясы президент Ли Чжэ Мён, оның жұбайы, министрлер, жолаушылар, жалпы 168 адамның жеке дерегінің интернетке тарап кетуіне қатысты алдын ала тергеу бастады. Бұл туралы Yonhap агенттігі хабарлады.
Ұлттық полиция агенттігінің мәліметі бойынша, маусым айында ақпараттық қауіпсіздікке қатысты ақылы сайтта «Жолаушылар тізімі (Оңтүстік Корея — Бельгия)» атты файл жарияланған.
Файлда президент пен оның жұбайы, үкіметтің жоғары лауазымды шенеуніктері, Президенттің атқарушы кеңсесінің (Чхонвадэ) және Сыртқы істер министрлігінің қызметкерлері, Президенттің қауіпсіздік қызметінің мүшелері және Чхонвадэ қызметінен хабар тарататын журналистердің — жалпы 168 адамның жеке дерегі болған. Ақпаратта корей және ағылшын тілдеріндегі есімдер, жұмыс орындары, лауазымдары, туған күндері, төлқұжат нөмірлері, берілген күндері және жарамдылық мерзімі қамтылған.
Файл табылған сайт пайдаланушыларға файлдар мен сілтемелердің зиянды кодтары бар-жоғын тексеруге мүмкіндік береді. Ақылы жазылушылар мен басқа пайдаланушылар платформаға жүктелген файлдарды жүктей алады.
Полиция Ли Чжэ Мённың маусым айында Бельгияға, Италияға және Францияға сапарлары кезінде президент ұшағындағы жолаушылардың деректері бар файлда зиянды бағдарламалар бар-жоғын тексеру кезінде платформаға таралып кеткен деп күдіктенеді.
Файл 2 маусымда, президенттің шетелге сапары алдында жүктеліп, шамамен бес ай бойы тұрған. Қазір файл жабық.
Оңтүстік Корея президентінің әкімшілігі ақпараттың тарап кеткені белгілі болған кезде шұғыл шаралар қабылданғанын, ары қарайғы жұмыс Сыртқы істер министрлігі және басқа да тиісті мекемелердің қолында екенін мәлімдеді.
Бұған дейін Оңтүстік Корея президенті полицияны түбегейлі реформалауға шақырған болатын.
Оңтүстік Кореяда құны 276 млн доллар болатын суперкомпьютер іске қосылды.
