Оңтүстік Кореяда 39 мыңға жуық адамның дерегі таралып кетті
АСТАНА. KAZINFORM — Оңтүстік Кореяның Mirae Asset Securities қаржы компаниясы хакерлік шабуылдар салдарынан 39 мыңға жуық адамның жеке дерегі таралып кеткенін хабарлады, деп жазады Aju News.
Шабуыл жасаушылар компанияның екі жүйесіне — мобильді авторизация қызметі мен ішкі корпоративтік желісіне заңсыз кірген. Салдарынан шамамен 3,8 мың клиенттің банк шотының нөмірі, сондай-ақ компанияның қазіргі және бұрынғы 35 255 қызметкері мен мердігеріне қатысты мәліметтер жария болып кеткен.
Ұрланған ақпараттың ішінде қызметкерлердің аты-жөні, телефон нөмірлері, электрондық пошта мекенжайлары, қызметтік идентификаторлары мен шифрланған құпиясөздері бар.
Компания өкілдері клиенттердің банк шотының нөмірлерінен басқа жеке деректері таралмағанын атап өтті.
Соңғы екі апта ішінде Mirae Asset Securities компаниясы Mirae Asset тобындағы кибершабуылдарға ұшыраған төртінші компания болды.
Оқиғадан кейін клиенттерге алаяқтардың қаржы ұйымының қызметкері ретінде хабарласып, жалған қоңыраулар шалуы немесе хабарлама жіберуі мүмкін екені ескертілді.
Еске сала кетейік, бұған дейін Оңтүстік Кореяда 470 мыңнан астам дерек желіге тарап кетті. Елде банктерге тексеріс басталды.
