Орал қаласында бес қабатты үйден өрт шықты

ОРАЛ. ҚазАқпарат – Орал қаласында бес қабатты үйден өрт шықты, деп хабарлайды ҚазАқпарат тілшісі.

БҚО төтенше жағдайлар департаментінің баспасөз қызметінен мәлім еткендей, оқиға 11 маусым күні Зачаган кенті Теміртау көшесі 19-мекенжайында болған.

«Сағат 11.32-де екінші қабатта балкон жанып, жалын жатынжай бөлмесіне ауысып, жеке заттар, жиһаз отқа оранды. Өрттің аумағы 20 шаршы метрді қамтыды. Пәтердің иесі – 88 жастағы кейуана. Жоғары және төменгі қабаттардан 18 адам өздері үйден шыққан, олардың үшеуі – бала. Зардап шеккендер жоқ. Өртті сөндіруге 18 адам 5 техникамен қатысты. «Тілсіз жау» сағат 11.51-де оқшауланып, 12.13-те ауыздықталды», деп хабарлады ведомстводан.

Еске сала кетейік, бұдан бұрын Орал қаласында «Бәйтерек» жабық базары өртеніп жатқанын жазған болатынбыз.