Орал тұрғыны: Қызымды дерттен құтқарған дәрігерге алғысым шексіз

АСТАНА. KAZINFORM – Алғыс айту күнінде Орал қаласының тұрғыны Президент іс басқармасына қарасты Медицина орталық ауруханасының дәрігері Абылай Серікбайға алғыс айтты.

Оралдық ана қызының 11 жастан жастап басы айналып, жиі талып қалатын дертке шалдыққанын айтады. Былтыр қазан айында Президент іс басқармасы Медициналық орталығының ауруханасына қаралып, магнитті резонанстық томография арқылы жеткіншектің сол жақ миындағы қантамырдың тұйықталғаны анықталады.

Тексеріс толық өткеннен кейін нейрохирург Абылай Серікбай күрделі отаны сәтті жасап шығады. Қазір науқастың жағдайы айтарлықтай жақсарып, ауруханадан шығуға дайындалып жатыр.

— Осы емханада Абылай Серікбай есімді білікті нейрохирург бар екенін естіп, Орал қаласынан келдік. Дәрігерге құжаттарымыздың электронды нұсқасын жібергеннен бастап бізбен байланыста болып отырды. Қандай талдаулар қажет, квотаны қалай алады, қалай дайындалып келу керек — бәрін түсіндірді. Дәрігер емес бауырымыздай болып кетті. Қызымның операциясы сәтті өтіп, қазір қалпымызға келіп жатырмыз. Енді ол жаңа өмір бастайды. Абылай Шоқанұлына өмір бойы алғыс айтып өтеміз, ғұмыры ұзақ болсын. Сонымен қатар күнде жағдайымызды келіп сұрайтын біздің емдеуші дәрігер Айлин Қанатқызына, осындағы барлық ұжымға алғысымыз шексіз, - дейді оралдық ана.

Күрделі отаны еңсерген қыздың сырқаты медицина тілінде «мойамойа синдромы» деп аталады. Бұл ауруда ішкі ұйқы артерияларының басты тармақтары тарыла бастайды немесе толығымен бітеліп қалады. Салдарынан миға қан жеткілікті түрде бармай, ми ішінде қосымша қантамырлардың (collateral) пайда болады. 

Бірақ бұл қантамырлар да уақыт өте келе миға қажетті мөлшерде қан жеткізе алмай қалуы мүмкін. Ауру асқына берсе, бас ауруы жиілеп, талма жиілеп, ақыры инсультқа әкеп соғуы мүмкін. Сондықтан дұрыс диагностика мен уақытында ем алу өте маңызды.