Оралбеков басқарған радикалды экстремистер тобы мүшелерінің бірі 8 жылға бас бостандығынан айырылды
АҚТӨБЕ. 15 тамыз. ҚазАқпарат - Ақтөбе қаласының №2 соты Оралбеков және басқалардың басшылығымен жұмыс істеген радикалдық экстремизм тобының құрамында болған 25 жасар сотталушыға қатысты қылмыстық істі қарастырды.
Облыстық соттың баспасөз қызметінен хабарлағандай, С. бір топ адамдармен алдын ала келісіп, бірнеше рет лаңкестік топтың қызметіне қатысқан, қаруды, оқ-дәрілерді және жарылғыш заттарды заңсыз түрде сатып алып, өткізіп, сатып, сақтап, тасымалдап немесе өзімен бірге алып жүрген. Сондай-ақ бір топ адаммен бірге бірнеше рет қару жасаған.
Оралбековтың тобы 2011 жылы ҰҚК-нің департаментінде жарылыс ұйымдастырғаны белгілі. Бандының кейбір мүшелері бұған дейін сотталған, соның ішінде жетекшісіне қатаң режимдегі колонияда 13 жылға бас бостандығынан айыру жазасы берілді.
Сот өкімімен сотталушы С. ҚР ҚК-нің 233-2 бабының 2 бөлімімен, 251 бабының 3 бөлімімен, 252 бабының 2 бөлімімен айыпты деп танылды, ол жалпы режимдегі түзеу колониясында 8 жылға бас бостандығынан айыру жазасына кесілді.
Сот өкімі заңдық күшіне енген жоқ.
