Оралда ардагер параспортшы 90 шақырымды алты күнде жаяу бағындырды
ОРАЛ. KAZINFORM – Ақын, Қазақстанның халық жазушысы Қадыр Мырза Әлидің 90 жылдық мерейтойына орай оралдық параспортшы, 79 жастағы Құбайдолла Хасанов 90 шақырым қашықтықты жаяу жүріп өтті.
Ардагер спортшының айтуынша, 90 шақырымдық марафонды алты күн ішінде бағындырған. Оның сөзіне қарағанда, күн сайын 15 шақырым жаяу жүріп отырған. Жанында мүмкіндігі шектеулі адамдарға арналған спорт клубының директоры Қайырбек Оңдағанов пен оның орынбасары Нұрлан Қазымов бірге болған.
– Бұл – менің қазақтың сыршыл ақынына деген құрметім. Осылайша оның 90 жылдық мерейтойына өз үлесімді қостым деп ойлаймын. Биыл көктемде Жеңістің 80 жылдығына орай 80 шақырымды жаяу жүріп өткен едім. Онда күн сайын 10 шақырымды еңсерсем, бұл жолы өз көрсеткішімді жаңарттым. Осы бастамам арқылы жаяу жүрудің денсаулыққа пайдалы екенін көрсеткім келеді, - деді Құбайдолла Хамзаұлы.
Параспортшы пара пауэрлифтингтен 2004 жылы Үндістанда, екі жылдан соң Филиппинде Азия чемпионы болған.
Еске сала кетейік, бұдан бұрын батысқазақстандық 79 жастағы параспортшының 80 шақырымды жаяу жүріп өткенін жазған едік.
