Оралда автокөлік қағып кеткен 16 жастағы жасөспірім көз жұмды
ОРАЛ. KAZINFORM - Орал қаласында автокөлік қағып кеткен 16 жастағы жасөспірім қайтыс болды.
БҚО денсаулық сақтау басқармасы баспасөз қызметінен мәлім еткеніндей, оқиға 9 ақпан күні Сарайшық көшесі 56-үй тұсында болды.
«Сағат 22.53-те жол-көлік оқиғасы болғаны жөнінде жедел медициналық жәрдем станциясына хабар түскен. 2007 жылғы жасөспірім өте ауыр жағдайда облыстық көпбейінді ауруханаға жеткізілді. Дәрігерлер тарапынан жүргізілген шараларға қарамастан, алған жарақаттары салдарынан науқас есін жимастан көз жұмды», деп хабарлады ведомстводан.
БҚО полиция департаментінің баспасөз қызметі оқиғаны растап, қазіргі кезде тергеу амалдары жүргізіліп жатқанын жеткізді.
Жасөспірімді қағып кеткен «ГАЗель» автокөлігінің жүргізушісі уақытша ұстау изоляторына қамалды.
