Оралда «Бағдат» сауда үйінен өрт шықты

ОРАЛ. ҚазАқпарат – Оралда «Бағдат» сауда үйінен өрт шықты, деп хабарлайды ҚазАқпарат тілшісі.

БҚО ТЖ департаментінің баспасөз қызметінен мәлім еткеніндей, оқиға 30 тамыз күні Әбубәкір Кердері көшесі бойында болды.

«Сағат 16.51-де Ә.Кердері көшесі 68-мекенжайында «Бағдат» сауда үйінің 2-қабатында шаруашылық тауарлары жанды. Аумағы 50 шаршы метрді қамтыған өрт сағат 17.35-те оқшауланып, 17.47-де толықтай сөндірілді. Зардап шеккендер жоқ. «Тілсіз жауды» ауыздықтауға 30 адам, 8 техника жұмылдырылды. Қазіргі кезде өрттің шығу себебі, келтірілген шығын анықталу үстінде», деп хабарлады ведомстводан.

Еске сала кетейік, бұдан бұрын БҚО-да 20 тонна киім тиелгене жүк көлігінің тіркемесі жанып кеткенін жазған болатынбыз.