Оралда бір азамат салықтан жалтарғаны үшін, екіншісі пара бергені үшін жауап бермек

ОРАЛ. Шілденің 13-і. ҚазАқпарат /Ғайсағали Ералы/ - БҚО бойынша экономикалық қылмысқа және сыбайлас жемқорлыққа қарсы күрес департаменті «Кайдан» ЖШС есепшотынан 2,4 млн. теңгені жымқырған З. деген азаматты ұстады.

Департаменттің баспасөз қызметінен ҚазАқпарат тілшісіне хабарлағанындай, З. бюджетке салық төлеуден жалтару мақсатында қаржыны қолма-қол ақшаға заңсыз айналдыруға көрсеткен қызметі үшін аталған соманы Орал қаласы кәсіпорындарының бірінің есепшотына аударып жіберген. Ол жалған кәсіпкерлікпен Г. деген азаматтың нұсқауымен айналысқан. Бұдан кейін Г. «Кайдан» ЖШС-ге қатысты тергеу алды тексеру материалы бойынша «оң» шешім қабылдау үшін қаржы полициясы инспекторына 10 мың АҚШ долларын ұсынған. Г. параның бір бөлігін беру үстінде қолға түсті.

Қазіргі уақытта Г-ның Қазақстан аумағында жалған кәсіпкерлікпен айналысып, мемлекетке елеулі залал келтірген тағы алты кәсіпорынның заңсыз қызметіне қатысы бары анықталды. Тергеу жұмыстары жүргізілуде.