Оралда «Денсаулық» клубының 25 жылдығына арналған волейбол турнирі мәреге жетті
Жарысқа қатысқан облыстық мәслихат хатшысы, «Денсаулық» клубының мүшесі Мәлік Құлшардың айтуынша, аталмыш клуб 1991 жылы жазда құрылды. Оның алғашқы жетекшісі облыстық волейбол федерациясының президенті Валерий Кондратенко (қазір марқұм) еді. Елбасының спорттың бұқаралылығын арттыру жөніндегі тапсырмасына сәйкес саламатты өмір салтын орнықтыру, ардагер ойыншылардың басын қосып, денесін шынықтыру мақсатында құрылған клуб құрамында қазірге дейін 100-ден астам адам жаттықты. Клубтың күні бүгін облыстың алты ауданында филиалдары құрылып, жұмыс жасауда.
«Денсаулық» клубының 25 жылдық мерейтойына арнайы келген, кезінде оның құрамында жаттыққан, қазір Саратов қаласында тұратын еңбек ардагері Алексей Дергунов қазақстандықтарға ел тәуелсіздігінің 25 жылдығына орай риясыз тілегін жеткізді.
Мерейтойлық турнирге Орал қаласы мен облыс аудандарынан барлығы жеті команда қатысып, бақ сынады. Жарыс қорытындысында «Денсаулық» клубы жеңімпаз атанса, Теректі, Ақжайық аудандарының командалары екінші, үшінші орындарды бөлісті. Төртінші орынға табан тіреген Қазталов волейболшылары да жүлдесіз қалған жоқ. Оларға кубок, дипломдар, медальдар мен сыйлықтар табыс етілді. Сонымен қатар Сергей Загной (Теректі) «үздік шабуылшы», Мұрат Меңдіғалиев (Ақжайық) «үздік қорғаушы», Мұзапар Таңатов (Бөкей ордасы) «үздік байланыстырушы», Ералы Құсайынов (Қазталов) «үздік ойыншы», Серік Есенов («Денсаулық») «турнир ақсақалы» атанып, ақшалай сыйлықтармен марапатталды.