Оралда «INNOVA - 2016» инновациялық жобалар байқауының жеңімпаздары анықталды
Жаңалық атаулыға құштар талантты жастарды ынталандыру мақсатында осымен үшінші рет ұйымдастырылып отырған байқауда жаратылыстану, инженерлік ғылымдар, мұнайгаз саласы, робот техникасы және IT-технологиялар бойынша конкурстық комиссияның сұрыптауынан өткен барлығы 31 жоба сарапқа салынды.
БҚО кәсіпкерлік және индустриалдық-инновациялық даму басқармасы басшысының орынбасары Әнуар Ниетқалиевтің айтуынша, Елбасы алдыңғы қатарлы отыз елдің қатарына ену үшін индустриалдық-инновациялық орталықты дамыту қажеттігін атап көрсеткен болатын. Қазіргі кезде Қазақстан өнертапқыштық пен патент жөнінен жетекші елдер сапында емес. Сондықтан байқаудың басты мақсаты - жастардың жаңалық пен ғылымға деген құштарлығын арттыру. Конкурстық комиссия іріктеп алған үздік жұмыстар Астанада өтетін «ЭКСПО - 2017» көрмесіне ұсынылатын болады.
«INNOVA - 2016» байқауы ҚР Инвестициялар және даму министрлігінің тапсырысы негізінде өткізіліп келеді. Байқаудың бас демеушісі «RT Alliance» ЖШС өкілі Ербол Мұхамбетов те жастарға сәтті қадам тіледі.
«Алгоритм» технопаркі» ЖШС жанындағы өңірлік инновациялар мекенжайының басшысы Павел Проскуриннің сөзіне қарағанда, 31 жұмыстың (17-сі - оқушылардікі, 14-і - студенттердікі) бәрі де әзірге жоба түрінде. Жобаларды жүзеге асыру үшін тәжірибелік үлгілері жасалып, олар өздерінің экономикалық тиімділігін көрсетуі тиіс. Сонда ғана сериялы түрде шығаруға болады. Дегенмен жастардың ғылыми жұмысқа деген қызығушылықтары зор екендігін байқау қиын емес. Мысалы, Тасқала ауданындағы Қ.Сәтбаев атындағы орта мектептің 9-сынып оқушысы Темірлан Мәуленнің үгіт жүргізу мен қалдық жинауға арналған «TUKS универсал» автономдық роботы назар аударуға тұрады. Жас ғалымның ойынша, роботты радиопульттың және оған қондырылған андроид базасындағы телефонмен басқаруға болады. Робот үш тілде «сөйлеп», тұрғындарды көшені ластамауға шақырады. Қондырғының ішіне арнайы бағдарламасы бар микропроцессор орнатылған. Сондай-ақ бейнекамерасы мен қашықтықтан хабар бере алатын радиотрансляторы бар. Мұны құрастыруға 9 ай уақыт кеткен, алдағы уақытта әлі де жетілдіре түсуге болады.
Орал қаласындағы №42 «Ақ ниет» гимназиясының шәкірті Әлихан Таласбаев жасаған «Экзоскелет» механикалық «қолы» да қызықты болып шықты. Мұның мақсаты - мүгедектер өмірін жеңілдету, яғни механикалық «қолды» киіп, адам кез келген жұмысты жасай алады. Жас техникте осындай 40 жоба бар екен.
Сол секілді «Назарбаев зияткерлік мектебінің» 10-сынып оқушылары Әлихан Шәріпов пен Тайыр Мырзағалиев «Әмбебап үйді» құрастырып шығарған. Жоба идеясы - жылжымалы конструкциялар арқылы үй алаңын кеңейту.
Сонымен, комиссия шешімі бойынша оқушылар арасында «Назарбаев зияткерлік мектебінің» оқушылары Талғат Молдаш пен Мерхан Мерғалиевтің атмосфералық ауадан электр қуатын алуға арналған құрылғысы үздік деп танылды. «Экзоскелет» жобасы үшін Ә.Таласбаев екінші орынды еншіледі.
Студенттер арасында Жәңгір хан атындағы Батыс Қазақстан аграрлық-техникалық университетінен келген Ольга Плахотнюк арнайы қосымшалар көмегімен битум алу жөніндегі жобасымен озып шықты.
Алғашқы үш орынды иеленгендерге 50, 30 және 20 мың теңге көлемінде ақшалай сыйлықтар мен дипломдар, ал қатысушыларға сертификаттар тапсырылды.
