Оралда «Қалауымыз - халық бірлігі» атты кітаптың таныстырылымы болды

ОРАЛ. 8 ақпан. ҚазАқпарат /Елжан Ералы/ - Бүгін «Жайық Пресс» ЖШС конференц-залында Қазақстан халқы БҚО ассамблеясы шығарған «Қалауымыз - халық бірлігі» атты кітаптың таныстырылымы болды.

Облыстық ассамблея төрағасының орынбасары Қуанышбай Төлебаевтың атап өткеніндей, қатты мұқабалы, түрлі-түсті суреттермен безендірілген аталмыш жинақ Қазақстан халқы Ассамблеясының 15 жылдығына орай шығарылды.

Елбасы Нұрсұлтан Назарбаевтың Қазақстан халқы Ассамблеясының ХVІ сессиясында сөйлеген сөзімен ашылған кітапта облыстық ассамблея мен өңірдегі этномәдени бірлестіктер қызметі туралы мол мағлұмат берілген. Енді Тәуелсіздіктің 20 жылдығына орай осындай жинақтар шығару қолға алынбақ. Журналист Екатерина Макеева кітапта қазақ халқының төңірегіне топтасқан өзге ұлт өкілдерінің өмірі тартымды берілгендігін атап өтті.