Оралда Құрманғазы оркестрі концерт қойды

ОРАЛ. 4 қазан. ҚазАқпарат - Құрманғазы атындағы қазақ мемлекеттік академиялық халық аспаптар оркестрі Орал қаласында концерт қойды.

Қазақ өнерінің ұстаханасына айналған, әлемге аты мәшһүр оркестрдің кезекті концерті ұлы күйші Құрманғазы Сағырбаевтың 190 жылдығына және 2012 жылы өмірден өткен күйші-композитор, ҚР халық әртісі, «Құрмет» орденінің иегері Тұяқберді Шәмеловтің рухына арналған еді.

Шымылдығы Түркештің «Көңіл­ашарымен» ашылған кеш Құр­ман­ға­зының «Балбырауыны», Дина­ның «16 жыл», Тәттімбеттің «Сар­жай­лауы­­мен» жалғасып, күйді сағынған кө­рер­мен әп дегеннен-ақ кең дала­ның құшағында көсілгендей әсер­ге бөленді. Домбыраның қасиетті үні алма-кезек Е.Брусиловский мен П.Чайковскийдің, артынша И.Та­ма­риннің композициялық шы­ғар­маларымен ауысып отырды.

Тұяқберді Шәмеловке арналған кон­церттің екінші бөлімінде оның күйлері тартылып, әндері шырқалды. Атап айтқанда, Т.Молдағалиевтің сөзіне жазылған «Нұр­ғи­саны сағыну», «Арманда кеткен ағалар» (өлеңі Қ.Мырза Әлінікі) әндері көпшілік­тің көзіне жас үйірді. Ал Тұяқбердінің «Дәулеткерей ақжелең», «Қали-Мә­мен - күмбір күй» күйлері дүйім жұрт­тың жүрегін толқытып өтті. Күй кеші Құр­манғазының «Сарыарқасымен» қорытындыланды.

Құрманғазы оркестрі бұл жолғы өнер сапарында өңірдің бірнеше ауданында болып, концерт қойды.