Оралда майдангер журналиске құрмет көрсетілді

ОРАЛ. Маусымның 1-і. ҚазАқпарат /Елжан Ералы/ - Облыс әкімі Бақтықожа Ізмұхамбетов маусымның 1-інде өңірге танымал журналист, Ұлы Отан соғысының ардагері Николай Чесноковты қабылдап, 85 жасқа толуымен құттықтады,

деп хабарлайды ҚазАқпарат тілшісі.

Орал педагогикалық институтында оқыған Н.Чесноков Ұлы Отан соғысына қатысып, Екінші Прибалтика майданында жаумен шайқасты. Елге оралғаннан кейін білімін тәмамдап, облыстық комсомол комитетінде қызмет етті. 1950-1960 жылдары облыстық радиокомитеттің төрағасы, кейін облыстық «Приуралье» газеті редакторының орынбасары сынды қызметтерді атқарды. Ол Орал қаласының тарихы жөнінде арнайы кітап жазды. Өлкетану тақырыбына жазылған басқа да еңбектері баршылық.

Ардагерді әріптестері атынан «Жайық Пресс» ЖШС бас директоры Шыңғыс Мұқан құттықтап, сыйлық табыс етті.