Оралда мұғалімнің оқушыға қол көтеру дерегі бойынша тексеру жүргізілуде
Оралда мұғалімнің оқушыға қол көтеру дерегі бойынша тексеру жүргізілуде, деп хабарлайды Kazinform.
Қоғам белсендісі Лұқпан Ахмедьяровтің Facebook-тегі парақшасында мәлім еткеніндей, оқиға 27 қараша күні №45 орта мектепте болған.
БҚО-да балалар құқығы жөніндегі уәкіл Борис Лаврентьев өзінің парақшасында аталған мәселенің педагогикалық этика жөніндегі кеңесте қаралып, тиісті шешім қабылданатынын жеткізді.
«Директор алдын ала Еңбек кодексіне сәйкес дене шынықтыру пәнінің мұғаліміне сөгіс, сынып жетекшісіне ескерту түрінде тәртіптік жаза жариялады. Дене шынықтыру пәнінің мұғалімі шешім қабылданғанға дейін қызметінен шеттетілді. Орал қаласы полиция басқармасы осы оқиға бойынша шешімін шығарады. Баламен психолог жұмыс істеуде. Аталған оқиға бақылауға алынды», деп жазды Б.Лаврентьев.
БҚО полиция департаменті баспасөз қызметінің нақтылауынша, 27 қараша күні Орал қаласындағы мектептердің бірінде дене шынықтыру пәні мұғалімінің 6-сынып оқушысын ұрғаны жөнінде хабар түскен.
«Оқиға орнына жедел тергеу тобы, Орал қаласы полиция басқармасының басшылығы, кәмелетке толмағандар ісі жөніндегі инспекторлары барды. Полиция қызметкерлері оқиғаның мән-жайын анықтап, сот-медициналық сараптама тағайындады. Қазіргі уақытта ҚР ҚК 140-бабымен кәмелетке толмағандарды тәрбиелеу бойынша міндеттерді орындамау дерегі негізінде сотқа дейінгі тергеу жұмыстары басталды», деп хабарлады ведомстводан.
БҚО білім басқармасы баспасөз қызметінен түскен мәліметке қарағанда, 27 қараша күні 6-сыныпта алтыншы сабақ кезінде оқушылар арасында келіспеушілік орын алып, дене шынықтыру пәнінің мұғалімі Разым Тасқарин оларды тәртіпке шақыруға тырысқан.
«Мектеп әкімшілігі орын алған жағдайды бейнебақылау камерасынан көріп, мұғалімнің тарапынан бұзушылық орын алғанын анықтады. 28 қараша күні мектепішілік әдеп кеңесінде дене шынықтыру пәнінің мұғалімі Р.Тасқариннің мәселесі қаралып, ҚР Еңбек кодексінің 64-бабы 1-тармағының 2-тармақшасына сай сөгіс берілді және сабақ жүктемесі азайтылды. Сонымен қатар 6 «а» сынып жетекшісі А.Алмурзинаға сынып жетекшілік міндетін дұрыс атқармағаны үшін ескерту берілді», делінген хабарламада.
