Оралда неміс халқының «Фашинг» ұлттық карнавалы тойланды
Қазақстан халқы БҚО ассамблеясының «Хаймат» неміс этномәдени бірлестігі ұйымдастырған шара мақсаты - жұртшылықты неміс ұлтының салт-дәстүрі, мәдениетімен таныстыру, өңірдегі ұлтаралық келісімді нығайту.
Мерекеге облыстағы этномәдени бірлестіктер өкілдері, Вальдорф бағытындағы мектеп-гимназияның кураторы Эльке Винтер ханым (Германия, Хаген қаласы), қала мектептерінен мұғалімдер мен оқушылар келді.
Карнавал меймандарын «Қоғамдық келісім» коммуналдық мекемесінің директоры Александр Әжіғалиев, «Хаймат» этномәдени бірлестігінің жетекшісі Эдуард Фрицлер қарсы алып, Достық үйінің фойесінде немістің ұлттық тағамдарынан дәм татуға шақырды. А.Әжіғалиев биыл этностар күні аясында әр ұлттық-мәдени бірлестік өз мейрамын тәуелсіздіктің торқалы тойына орай атап өтіп жатқанын айтып, неміс карнавалына сәттілік тіледі. Мереке аясында ұлттық шығармашылық ұжымдар өз өнерлерін көрсетті.
Фашинг карнавалы жыл сайын Германия қалалары мен ауылдарында аталып өтіледі. Карнавал 11-інші айдың 11-інші күні сағат 11-ден 11 минут кеткенде басталады. Тұрғындар өз үйлерін, дүкендерді, мейрамхана, сыра барларын мерекеге арнап безендіреді, кіреберіске сабаннан жасалған карнавалдық қуыршақтарды іліп, мейрам біткен соң оларды өртейді. Ең үлкен шерулер Кельн, Дюссельдорф, Майнц сияқты ірі қалаларда өтеді. Әдетте карнавалдың бірінші күні (бейсенбі) әрбір қала ханзада мен ханшайымды таңдайды. Ал кешке түрлі дәмді тағамдар дайындап, бір-біріне қонаққа барады, мейрамханалар мен барларда сауық кештерін ұйымдастырады. Карнавал апта бойы, бейсенбіден сәрсенбіге дейін жалғасады. Әрбір күн өзіне тән өзгешелігімен ерекшеленеді. Фашинг карнавалы адамдардың көңіл-күйін көтеріп, тұрғындарға мереке мен шаттық сыйлау үшін өткізіледі.
Айта кетейік, «Хаймат» Орал неміс мәдени-ағарту қоғамы» қоғамдық бірлестігі 1997 жылы құрылған. Облыста 1,5 мыңнан астам неміс ұлтының өкілдері тұрады.
