Оралда пәтер тонап, 2 млн теңге шығын келтірген қылмыстық топ ұсталды

ОРАЛ. KAZINFORM – Батыс Қазақстан облысында криминалдық полиция қызметкерлері жеке үйлерді тонады деген күдікпен қылмыстық топты ұстады.

БҚО полиция департаментінің баспасөз қызметінен мәлім еткеніндей, аталған топ Орал қаласы мен Бәйтерек ауданында бірнеше ірі ұрлыққа барған. 

Күдіктілер үш үйге пластикалық терезені итеріп кіріп, алтын бұйымдарды (сырға, сақина, алқалар және т. б.) және ақшалай қаражатты жымқырған. Ұрлықтың кешкі және түнгі уақытта үй иелері болмаған кезде жасалғаны анықталды. 

— Жедел іздестіру іс-шаралары нәтижесінде БҚО полиция департаментінің қызметкерлері облыстың төрт тұрғынын ұстады. Олардың үшеуі бұрын бірнеше рет ұрлық, тонау және алаяқтық қылмыстарын жасағаны үшін сотталған. Ұрланған заттардың бір бөлігі күдіктілер өткізіп жіберген орындардан тәркіленді. Қазіргі уақытта үш эпизод бойынша алдын ала тергеу басталды. Қолға түскендер уақытша ұстау изоляторына қамауға алынды. Жалпы шығын сомасы 2 миллион теңгеден асады. Күдіктілердің басқа да осындай қылмыстарға қатыстылығы тексерілуде, — деп хабарлады ведомстводан.

Еске сала кетейік, бұдан бұрын БҚО-да демеушілік қаражаттың жұмсалуына байланысты қылмыстық іс қозғалғанын жазған болатынбыз.