Оралда сотталғандарға 2,7 млн. теңге қосымша ақы төленбегендігі анықталды

ОРАЛ. 25 желтоқсан. ҚазАқпарат - Облыс прокуратурасы «Еңбек» РМК «Еңбек-Орал» Батыс Қазақстан филиалында еңбек заңнамасының тұрақты түрде бұзылып отырғандығын анықтады.

Облыс прокуратурасының баспасөз қызметінен түскен мәліметке қарағанда, филиал әкімшілігі Еңбек кодексі 134-бабы 1-бөлімін бұза отырып, 38 жазасын өтеушінің биылғы қыркүйек айындағы жалақысын кешіктіріп, 11 және 24 қазанда ғана төлеген. Сонымен қатар 2011-2013 жылдары 33 сотталған адамға жұмыс уақытынан тыс және түнгі мезгілде, мереке және демалыс күндері үшін 2,7 млн. теңге көлемінде қосымша ақы төлеу «ұмыт қалған». Облыс прокуратурасының ұйғарымына сәйкес 3 жазасын өтеушіге 76,5 мың теңге қосымша ақы төленді, ал мерзімін өтеп шыққан қалған 30-ына қосымша ақысын қайта есептеу туралы хабарлама жолданды.

«Еңбек-Орал» РМК БҚОФ директорының бұйрығымен кінәлі тұлғалар тәртіптік жауапкершілікке тартылды.

БҚО бойынша бас мемлекеттік еңбек инспекторының қаулысымен еңбек заңнамасын бұзғаны үшін «Еңбек» РМК мен «Еңбек-Орал» РМК БҚОФ директоры Р.Шоңаевқа ҚР Әкімшілік құқықбұзушылық кодексі 87-бабына сәйкес тиісінше 259650 теңге және 8655 теңге көлемінде айыппұл салынды.