Оралда су басу қаупіне байланысты саяжай тұрғындары эвакуацияланды
ОРАЛ. ҚазАқпарат – Оралда су басу қаупіне байланысты Маштаков ауылынан тұрғындар көшірілді, деп хабарлайды ҚазАқпарат тілшісі.
БҚО ТЖ департаментінің баспасөз қызметінен мәлім еткеніндей, 14 наурыз күні сағат 20.00-де Маштаков ауылына кіреберісте жергілікті маңызы бар топырақты жолды су шайып кетті.
«Соның салдарынан Маштаков ауылына қауіп төнді. 70-80 тұрғын өз еріктерімен жақын-жуықтарына орналасты. Қалғандары Деркөл кентіндегі мәдениет үйіне эвакуацияланды. Халықты көшіру үшін «Уралавтотранс» ЖШС автопаркінен бір автобус шығарылды. Сондай-ақ ТЖ күштерінен 76 адам, 9 техника, жергілікті атқарушы органнан 3 автобус, экскаватор, 3 «КамАЗ», Орал қаласы полиция басқармасынан 6 техника, 15 адам жұмылдырылды», деп хабарлады ведомстводан.
Еске сала кетейік, бұдан бұрын Батыс Қазақстанда ауылға су кіріп, 44 адам эвакуацияланғанын жазған болатынбыз.
Сондай-ақ БҚО-да республикалық жолды су шайып кетті.
БҚО-да су шайып кетуіне байланысты тағы бір республикалық жол жабылды.
Батыс Қазақстанның Бәйтерек ауданында төтенше жағдай жарияланды.
Ақсай қаласында үйлерге су кіріп, 13 адам эвакуацияланды.
