Оралда татарлар өз мерекесін атап өтті (ФОТО)
Татар мәдени қоғамы ұйымдастырған мерекеде туысқан халық өкілдері ән салып, би биледі, келушілерге ұлттық тағамдарын ұсынды. Фойеде Рауза Ахметғалиеваның ұлттық киімдер көрмесі ұйымдастырылды. Сондай-ақ Зеленов ауданы Махамбет ауылында тұратын, сондағы өз үйін ерекше безендірген Салих Халелов өз суреттерін осындағы көрмеге қойды. Батысқазақстандық фотосуретші Рафхат Халеловтің «Жайық татарлары» атты фотокөрмесін де тамашалаушылар аз болған жоқ.
Жастар шығармашылығы орталығына жиналған жұртшылықты облыс әкімінің орынбасары Бақтияр Мәкен осынау мейраммен құттықтап, елімізде сан ұлт өкілдерінің өз тілін, салт-дәстүрі мен мәдениетін дамытуына толық жағдай жасалып отырғанын атап өтті. РФ-ның Орал қаласындағы вице-консулы Юрий Пономарев Ресейде де әр халықтың дамуына, өз тілдерін сақтауына барынша мән беріліп отырғанына тоқталды.
Айта кетейік, Батыс Қазақстан облысында 8,5 мыңдай татар ұлтының өкілдері тұрады. Орал қаласында татар халқының ұлы ақыны Ғабдолла Тоқай атындағы көше бар және оның бойында мүсіні орнатылған. Сонымен қатар Ғ.Тоқай атындағы музей де жұмыс жасайды.