Оралда тендер өткізу кезінде бәсекелестікке қарсы әрекетке жол берілген
ОРАЛ. KAZINFORM - Мемлекеттік сатып алу кезінде Орал қаласы тұрғын үй-коммуналдық шаруашылық, жолаушылар көлігі және автомобиль жолдары бөлімі тарапынан бәсекелестікке қарсы іс-қимыл деректеріне жол берілгені анықталды.
Заңгер, БҚО қоғамдық кеңесінің мүшесі Бауыржан Ахметжанның Фейсбук әлеуметтік желісіндегі парақшасында мәлім еткеніндей, ол облыс прокуроры Серік Шалабаевтың атына бюджет қаражатын тиімді пайдалану және бәсекелестікті дамыту жөнінде хат жазған.
Хатында Орал қаласы көше-жол желісін күтіп ұстау және санитарлық тазалау үшін шаһарды бірнеше бөлікке бөлу, осы жұмыстарды жалғыз өзі атқаратын компания-монополиске қатысты прокурорлық тексеріс жүргізу керектігін көрсеткен.
Осыған орай БҚО прокурорының бірінші орынбасары Дәурен Омарғалиевтен келген жауапта аталған бөлім қызметіне талдау жүргізілгені айтылған.
«Нәтижесінде ҚР Бәсекелестікті қорғау және дамыту агенттігі БҚО бойынша департаментіне Орал қаласын санитариялық тазарту жөніндегі лоттардың бәсекелестікті қорғау саласындағы заңнамаға сәйкестігі тұрғысынан тергеу тағайындау туралы талап жолданды. Департаментпен жүргізілген тергеп-тексеру қорытындысы бойынша мемлекеттік сатып алуды өткізу кезінде бөлім тарапынан бәсекелестікке қарсы іс-қимыл деректері анықталды. ҚР Кәсіпкерлік кодексінің 226-бабы 1-тармағы 2) тармақшасына сәйкес департамент бәсекелестікті қорғау саласындағы ҚР заңнамасын бұзушылықтарды жою туралы нұсқама енгізді (қаралу сатысында). Сонымен қатар бөлімнің бұрынғы басшысы Жандос Дүйсенғалиев ҚР Әкімшілік құқық бұзушылық кодексі 163-бабы 1-тармағына сәйкес әкімшілік жауапкершілікке тартылды», делінген ресми жауапта.
Б.Ахметжанның нақтылауынша, Ж.Дүйсенғалиевке 1 млн 107,6 мың теңге немесе 300 АЕК көлемінде айыппұл салынған.
Осы мәселеге байланысты ҚР Бәсекелестікті қорғау және дамыту агенттігі БҚО бойынша департаментінің басшысы Салават Вахитовтің жауабында Орал қаласы тұрғын үй-коммуналдық шаруашылық, жолаушылар көлігі және автомобиль жолдары бөлімінің көшелерді күтіп-ұстау және санитарлық тазалау жұмыстарының барлығын бір лотқа біріктіріп, Кәсіпкерлік кодексінің 194-бабының талаптарын бұзғаны атап көрсетілген. Аталған лот бойынша мемлекеттік сатып алу кезінде талап етілетін техникалық сипаттамалар күрделендірілген.
«Осылайша, Оралда көше-жол желісін күтіп ұстау және қаланы санитарлық тазалау жұмыстарына мемлекеттік сатып алуды өткізу кезінде бәсекелестікке қарсы әрекет жасалғаны анықталып отыр. Монополист мекеме «Жайық Таза қала» ЖШС-ға тоғыз жылда 25,4 млрд теңге бөлінген. Еліміздің басқа қалаларында осы жұмыстардың қалай атқарылатынын сұрастырып көрдім. Мысалы, Ақтөбе 24 учаскеге бөлінген, 17 мердігерлік мекеме қызмет атқарады. Сол секілді Алматы қаласында қысқы кезеңде көше-жол желісін 10 мердігер ұйым тазалайды. Оралда солай жасауға не кедергі?», дейді Б.Ахметжан.
Еске сала кетейік, бұдан бұрын қала көшелерінің дұрыс тазаланбауына байланысты Орал әкімдігі жауап бергенін жазған болатынбыз.
