Оралда тіркелмеген жабдық үшін медицина орталығына жарты млн теңге айыппұл салынды

ОРАЛ. KAZINFORM – Орал қаласы әкімшілік құқық бұзушылық жөніндегі мамандандырылған сотында ҚР Әкімшілік құқық бұзушылық кодексі 426-бабы 3-бөлігіне сәйкес іс қаралды.

БҚО сотының баспасөз қызметінен мәлім еткеніндей, уәкілетті мемлекеттік орган жүргізген тексеру барысында Орал қаласында «Гармония» БФС мекемесінде Қазақстанда тіркелмеген, Ресейде өндірілген фототерапиялық қызыл сәулелі жарықдиодты құрылғының сақталғаны анықталды.

Сотта медициналық орталықтың өкілі сатушының 2021 жылы тауар-медициналық бұйымға тіркеу куәлігін бергенін мәлімдеді. 

Құқық бұзушылықтың жасалғаны әкімшілік құқық бұзушылық туралы хаттамамен, тексеру тағайындау және тексеру нәтижелері туралы актілермен, тараптардың түсіндірмелерімен, істің басқа материалдарымен расталады.

- Аталмыш ЖШС адам денсаулығына зиян келтірмейтін тіркелмеген медициналық бұйымдарды сатып алу, тасымалдау, сақтау белгілері бойынша құқық бұзушылыққа барған. Сот медицина орталығына 516 880 теңге көлемінде айыппұл салды. Сонымен қатар медициналық жабдық тәркілеуге жатады. Сот шешімі заңды күшіне енді, - деп хабарлады ведомстводан.

Еске сала кетейік, бұдан бұрын Оралда төбелес кезінде ер адамның құлағын кесіп алған тұрғынның сотталғанын жазған болатынбыз.