Оралда тыл ардагеріне құрмет көрсетілді

ОРАЛ. ҚазАқпарат - Батыс Қазақстан облысында басшылық қызметтер атқарған Мақсот Батыров 85 жасқа толды.

Осыған орай 20 қараша күні облыс әкімі еңбек және тыл ардагерін қабылдап, құрмет көрсетті. Кездесуде аға буын үлгісі, ұрпақтар сабақтастығы туралы әңгіме өрбіп, Елбасының бастауымен тәуелсіз Қазақ елінің одан әрі қарыштап дамуында халық бірлігінің маңызы зор екені атап көрсетілді.

Айта кетейік, Алматыдағы зоомалдәрігерлік институтын 1954 жылы бітірген М.Батыров еңбек жолын мал дәрігері болып бастап, кейін 40 жылдан астам уақыт бойы бірнеше ауданда және облыстық ауыл шаруашылығы басқармасында басшылық қызметтер атқарды.

Өңірдің қоғамдық-саяси өміріне белсене араласқан ардагер 2001-2006 жылдары облыстық соғыс және еңбек ардагерлері кеңесі төрағасының орынбасары, 2006-2011 жылдары төрағасы болды.